غلطانة؟
بقلم /راندا محمود
لما يكون جوزى داخل م الباب
افضل اشتكي له العيشة الهباب
و احكي له اللى حصل
من جارتى
و البواب
اصرخ من شقاوة العيال
و درجاتهم اللى خلت شعري شاب
وماسبش من ايدى غلطة تعدى
ابقى انا غلطانة فى حاجة يا أختى؟
لما اقعد اندب حظى
واقول نفسى ونفسى
اختى فى بيتها الحاجة ديا
وجارتى عندها هيا هيا
وعند فلانة و علانة
وانا المحرومة وحديا
وانا بيتى دواليبه مليانة
عشان حاجة نقصانى اندب بختى
ابقى انا غلطانة فى حاجة يا اختى؟
لما ابقى عايزة شبكة م الغالية
وفرح بشئ و شويات
وقبل ما اشترى الحاجات
لو بفلوس كتير اروح شاريا
احب الناس تسألنى بكام
اضرب ف العالى و اقوم قايلا
مدارس ولادى مشهورة
وعيلتى م الدرجة الاولى
بلاقى فى الفشخرة راحتى
ابقى انا غلطانة فى حاجة يا اختى؟
