الحلقة الثالثة: مواجهة النفس
كتبت / دعاء التوني
في مرحلة في الرحلة دي مفيش هروب منها، مرحلة بتبقى ساكت من بره بس دوشة جدًا من جوه.
“مواجهة النفس”
مش إنك تعرف إنك تايه، لكن إنك تقف وتسأل: أنا سايب نفسي ليه توصل لكده؟؟
في اللحظة دي مش هتقدر تحط اللوم على حد، لا أهل ولا ظروف ولا حد.. هتبقى إنت قدام نفسك.
يمكن تفتكر مواقف عدّت عليك؛ مرة سكت وإنت نفسك تتكلم، مرة وافقت وإنت جواك غير راضي، مرة مشيت في طريق وإنت عارف إنه مش شبهك. المواقف دي صغيرة وهي بتحصل، بس بتتراكم وتتحول مع الوقت لإحساس تقيل اسمه: أنا مش عايش نفسي.
مواجهة النفس مش سهلة، لأنها هتكشف حاجات من زمان بتهرب منها:
خوفك من الفشل.
خوفك من رأي الناس.
خوفك من إنك تجرّب وتغلط.
وأصعب حاجة؟
إنك تعترف!
تعترف إنك كنت بتختار الأسهل، مش بتواجه.
تعترف أحيانًا إنك كنت بتظلم نفسك بإيدك.
بس رغم صعوبتها، اللحظة دي مهمة جدًا، لأنها أول مرة تشوف فيها الحقيقة من غير تزييف.
مواجهة النفس مش معناها جلد ذات، ولا إنك تكره نفسك على اللي فات، بالعكس، هي إنك تقول:
آه،، أنا غلط.
آه،، أنا كنت خايف.
بس خلاص، أنا شايف ده دلوقتي.
“الوعي هنا”
بيفصل بينك وبين النسخة القديمة، مش دور الضحية.
ومع كل مواجهة صادقة، بتاخد خطوة صغيرة لقدام. يمكن مش هتتغير في يوم، بس على الأقل بقيت صريح مع نفسك. وفي المرحلة دي، الصدق مع النفس أهم من الكمال.
الحلقة القادمة… هتيجي لحظة القرار: تكسر القيود ولا ترجع تاني؟؟
لما تبدأ تقول أول مرة من قلبك: “لأ”.
