مش لاقيا أمي
راندة محمود
قبلها كده بكام يوم
وانتي بين الصحيان و النوم
قولتيلي أنا عروسة
أحلى عروسة يا حبيبتي
يا أمي و بنتي
وكانت على جبينك أخر بوسة
قبل ما ألف حواليك الكفن
قلبي معاكي ادفن
وبعدها غبتي
وروحي بقت مش فيا
وأديني بابص حواليا
مش لقياكي
أزاي ايدي طوعتني
وسيبتك تروحي
عايشة من بعدك تايهه
مش لاقيا دوا لجروحي
في كل مكان شيفاكي
سمعاكي
بستناكي
تندهي
تتنرفزي
تزعقي
تديني حاجة
انا دلوقتي محتاجة
لحضن…لبوسة م الخد
انا دلوقتي ماليش حد
عيوني زاغية في كل مكان
يمكن الاقي حد يشبهك
ح انسى الزمان و… الايام
اللي فاتت و عدت
وأرجع عيلة لابدة في حجرك
مكتفية بيكي م الدنيا
ارجعيلي و لو ثانية
اعتذر لك علي كل اللي زعلك مني
عايزاكي شوية تستني
أقولك كل الكلام الحلو
اللي ما قولتهوش
كل حضن مكنتش فاضية
وما حضنتهوش
اعتذر لك علي كل( لأ) قولتها
بمزاجي أو غصب عني
علي وقت ضاع فاشوش
وأنت بعيدة وأنا مش مستغني
واعتذر علي كل تكشيرة
كشرتها في وشك
علي كل مرة نادتيني و طنشتك
كنت فاكرة اني ما دمت بنتك
ح تفضلي و ماتمشيش
ما كنتش فاكرة اني ح اعيش
ويجي يوم ادور عليكي
وما القاكيش
