لسة فاكر
سحر أبوالعلا
لسة فاكر يومها
وانت ايدك حاضنة ايدي
يومها حسيتك في دمي
واني بجري في وريدك
يومها غمضت عنيا
شفت معاك حياتي جنة
شفتنا بنبني آمالنا
طوبة حب وطوبة رحمة
جنبها طوبة مودة
شفت بنوتة جميلة بتشبهك
بتيجي تجري عليا بغيرة
لو لمحتني بلمسك
طالعة لك عيونها حلوة
وطالعة ليا عنيدة جداً
بس أحلى ما فيها
انك يا حبيبتي مامتها
شفتني وشفتك ساعتها
يوم فرحها دموعنا نازلة
واحنا بنودعها يومها
وبنحلم نشوف ولادها
كل ده يا حبيبتي شفته
وانت ايدك حاضنة ايدي
والنهاردة العمر عدى
وفي فرح ست البنات
شفت كل شريط حياتنا
شفتني وشفتك هناك
ولا كإن العمر فات
وانت ايدك حاضنة ايدي
