قال وقالت
دعاء موسي
المجتمع مقسوم نصين رجال ونساء كل نص فيهم شايف نفسه ضحية للطرف الاخر لكن الحقيقة ان كل واحد ضحية نفسه.
في جلسة صلح ع فية بين زوجين كنت متخيلة المشكلة كبيرة جدا علشان كدة عملوا الجاسة المعرفية دي ولجأوا لحكم من أهلها وحكم من اهله.
لكن الحقيقة ان الموضوع كان تافه جدا والمشكلة أساسها التراكمات النفسية عند الزوجين.
قال اول سنة جواز كانت ست وحلوة ومهتمة بنفسها ومهتمة بيا بعد ما خلفت بقت واحد صاحبي.
قالت اول سنة جواز كان بيجي من برة يضحك في وشي ويقولي عاملة ايه ويقعد يحكي معايا وكان مهتم بتفاصيل بعد الولادة بقى يقولي خدي ابنك وروحي نامي في حتة تانية مش عارف انام.
قال كنت باجي من شغلي القيها مستنياني ومحضرة الغدا نتغدى سوا بقيت الاقيها نايمة او بتشتكي وتقول نفسي انام.
قالت عمره ما قالي نامي ساعتين ارتاحي فيهم وانا هاقعد بالولد علطول بيزعق ويقولي ابنك مش مبطل زن وهو ابني لوحدي.
قال بتغير مو اي واحدة تشوفها.
قالت بابقي ماشية جنبه يبص على البنات ويقولي شايفة الستات.
قال مقولتش ليه انك تضايقي ما انتي كنتي بتضحكي.
قالت كنت با أرى كسرة قلبي.
قال مش بتبطل طلبات مهما اقول لا بردو بتطلب.
قالت مش طلبات البيت والولاد.
قال الحياة بقت غالية و مش كل حاجة بقت متاحة.
قالت مقولتش ليه مش عيا دلوقتي.
قال مش عايز أصغر في عينكي.
واتحلت المشكلة لما اتكلموا مع بعض طب ليه من البداية منتكلمش مع بعض اللي متضايق من حاجة يقولها للتاني خلي بالك انا بتزعل من كذا متعملهوش تاني علشان بيضايقني والطرف التاني يتقبل ساعتها الحياة هتبقى أسهل وتفضل بيوتنا مقفولة علينا.
نسيت اقولكم ان المشكلة كانت على حلقة مسلسل وماتش كورة وكانت القشطة اللي قطمت ظهر البعير قالها انا زهقت من عيشتي معاكي وقالت انا اخترت غلط.
والحقيقة لا هو زهق ولا هي اختارت غلط الحقيقة جهل في التواصل وطريقة الحوار.
تصفية النفوس اول بأول بتعدي الحياة.
على عكس الصمت وردود الفعل المكبوتة يخربوا البيوت.
اسمعوا بعض اتكلموا مع بعض اهتموا بتفاصيل بعض.
اللهم ألف بين قلوبنا وأصلح ذات بيننا واعدنا سبل السلام.
