صرخه وحب ودفا يعني الأم
كتبت شيماء حبشي
انا اللي بطبطب ..وانا اللي بزعق وبضرب
انا اللي بحب …وانا اللي عمرى فى حياتى ما اقدر اكره
انا اللي بدادى ..وانا بردو اللي قلبى بيوجعنى وافضل اهاتى
انا اللي بقول لا .. ومن كلمتين زن برجع فى كلمتى بكل سهوله
انا اللي بفضل اهدد هعمل فيكم واسوي … وبعدها بضحكه برجع فى رأيي
انا اللي بفضل اشتكى واقول مش قادره … وفى لحظه بنسى التعب واقوم زى الجمل
انا اللي بقول يخربيت كده زهقت طهقت … ولو فى يوم بعدت ازهق ويمكن كمان اتجنن
انا اللي ذى زى الكل صوتى طالع وصويتى مسمع الكل … وبردوفى نفس اللحظه باخد بالحضن واضم
انا اللي بقول ماليش دعوه ان شاءالله تخرب هو انا بتعب عشانى .. وبعدها بلحظه بجرى بالشبشب وراهم عشانهم مش عشانى
انا اللي بخاف وانا اللي بترعب انا اللي بحب وانا اللي بتخنق
انا اللي بعشق وانا اللي بزعق انا اللي بصوت وانا بردو اللي بحن
انا اللي بذاكر ..وانا اللي بتجنن … ويمكن انا اللي بمتحن وانا كمان اللي بنجح
انا اللي بسهر وانا اللي من نظرتهم بفهم
وانا بردو اللي بموت لو ظهر على وشوشهم نظرة تعب
انا اللي نظرة الفرح منهم عندى بالدنيا … وحياتهم هما الهوا اللي بتنفسه
أنا الأم ❤️👩👧👦
