*الحلقة الرابعة: كسر القيود*
كتبت / دعاء التوني*
بعد ما واجهت نفسك وشوفت الحقيقة زي ما هي…
بييجي السؤال الأصعب:
هتفضل زي ما أنت؟… ولا هتتغير؟
التغيير مش فكرة حلوة بتفكر فيها،
التغيير قرار،
وقرار زي ده ليه ثمن.
أول ما تحاول تعمل حاجة مختلفة، هتحس بمقاومة من جوه ومن بره.
جواك صوت بيقول:
“خليك زي ما أنت، ده الأمان… بلاش تغيّر، يمكن تفشل.”
وبره، ناس مستغربة:
“مالك اتغيرت ليه؟”
“إيه الأفكار دي؟”
“خليك طبيعي.”
بس الحقيقة إن “الطبيعي” ده
كان سجن مريح.
كسر القيود مش معناه إنك تبقى متمرد وخلاص،
ولا إنك تعاند أي حاجة،
هو إنك تبدأ تختار بوعي.
يمكن تقول “لا” لأول مرة
في موقف كنت دايمًا بتسكت فيه.
يمكن تبعد عن ناس مش شبهك،
حتى لو متعود عليهم.
يمكن تجرب حاجة جديدة
وأنت مش ضامن النتيجة.
وهنا بيظهر الخوف تاني…
بس الفرق؟
إنك المرة دي فاهم إن الخوف
مش علامة إنك غلط.
الخوف غالبًا بييجي
لما تكون بتعمل حاجة صح لأول مرة.
كسر القيود بيبدأ بحاجات صغيرة:
قرار بسيط…
كلمة صريحة…
موقف مختلف…
ومع كل مرة بتختار نفسك،
السلاسل بتخف.
مش لازم تكسر كل حاجة مرة واحدة،
ولا تبقى شخص جديد في يوم وليلة.
كفاية إنك ما ترجعش لنفس النسخة القديمة،
وأنت عارف إنها مش أنت.
الحرية مش إنك تعمل كل حاجة،
الحرية إنك تبقى صادق مع اختياراتك.
ومع كل خطوة شجاعة،
هتقرب أكتر لنفسك الحقيقية.
الحلقة القادمة:
إعادة بناء
الذات
إزاي تبدأ من جديد…
بشكل يشبهك أنت، مش أي حد تاني.
