معظمنا عارفين ان فيه سورة اسمها سورة آل عمران … بس مين عارف قصتهم ؟!التفاصيل داخل المقال 

معظمنا عارفين ان فيه سورة اسمها سورة آل عمران … بس مين عارف قصتهم ؟!التفاصيل داخل المقال                         كتب /اللواء جمال رشاد 

٥ رمضان
معظمنا عارفين ان فيه سورة اسمها سورة آل عمران … بس مين عارف قصتهم ؟!
أبطال قصتنا هم عمران الأب و زوجته اللي يقال ان اسمها (حنة بنت فاقودا) وكان عندها اختين..
الاسرة دي كانت أسرة بسيطة .. وعايشين في فلسطين لما الرومان دخلوا بعقيدة الوثنية وتعدد الآلهة واضطهدوا أي حد مش مؤمن بكلامهم لدرجة عملوا ساحة يترمي فيها أي حد يرفض دينهم للأسود والنمور تاكله .
زوجة عمران شايفة الوضع الغلط ده ، وعايزة تعمل حاجة لكن وقتها ماكانش عندها ولد.
وكان عندها اخت اسمها إيشاع اتجوزت سيدنا زكريا وفضلوا سنين طويلة مبيخلفوش بس بعد كدة هيرزقوا بسيدنا يحيي .
تخيل بقه ان سيدنا زكريا لما كبر قال (قَالَ رَبِّ إِنِّي وَهَنَ الْعَظْمُ مِنِّي وَاشْتَعَلَ الرَّأْسُ شَيْبًا ) ..
زوجة عمران برضه قالت انا عايزة اخلف وتمنت انها تجيب ولد يصلح فساد الرومان رغم ان هي وعمران سنهم كبير جدا طب ازاي؟؟
وفضلت تدعي ربنا كتير واذا بالمفاجأة .. يُستجاب الدعاء ⁦وحملت وقال يا رب اللي في بطني دة ليك انت بس ..ومش عايزة اي حاجة.
(إِذْ قَالَتِ امْرَأَتُ عِمْرَانَ رَبِّ إِنِّي نَذَرْتُ لَكَ مَا فِي بَطْنِي مُحَرَّرًا فَتَقَبَّلْ مِنِّي ۖ إِنَّكَ أَنْتَ السَّمِيعُ الْعَلِيمُ)
طب هيحصل ايه ؟
المفاجأة بقه… انها علي غير التوقع جابت انثي تاني .. وكإن ربنا عايز يقول لنا إنه سبحانه ينصر دينه بمن يشاء،وكيفما شاء.
(فَلَمَّا وَضَعَتْهَا قَالَتْ رَبِّ إِنِّي وَضَعْتُهَا أُنْثَىٰ وَاللَّهُ أَعْلَمُ بِمَا وَضَعَتْ وَلَيْسَ الذَّكَرُ كَالْأُنْثَى ).

طب مين الأنثى دي؟
دي سيدة نساء العالمين السيدة مريم
(وَإِنِّي سَمَّيْتُهَا مَرْيَمَ وَإِنِّي أُعِيذُهَا بِكَ وَذُرِّيَّتَهَا مِنَ الشَّيْطَانِ الرَّجِيمِ)
انها تسميها مريم ده دليل علي ثباتها برضو رغم انها انثى .. لإن مريم يعني العابدة او خادمة العباد.
نبينا محمد عليه الصلاة و السلام بيقول لنا حديث جميل اوي علي الآية دي .. ( ما من مولود يولد ويبكي الا ويمسه الشيطان .. إلا مريم وعيسي )
طب ليه ؟
لأن الام دعت ربنا ونذرت اللي في بطنها له…. فربنا استجاب دعوتها.
وقصة امرأة عمران هتنتهي هنا عشان تبدأ قصة ستنا مريم ……
ستنا مريم هي المرأة الوحيدة اللي ذكرت بإسمها في القرآن،
يعني هنلاقي مثلا ( امرأة عمران، ملكة سبأ ) لكن ستنا مريم مذكورة باسمها صراحة .. وذكر اسم مريم في القرآن ٣٤ مرة
ستنا مريم كانت بتحب ربنا حب شديد وبتسجد كتير و بتحب العمل الخيري بتساعد الايتام والارامل وكانت خادمة لبيت المقدس…
دي كمان اعتزلت وبعدت عن اهلها عشان تعرف تعبد ربنا براحتها.
(وَاذْكُرْ فِي الْكِتَابِ مَرْيَمَ إِذِ انْتَبَذَتْ مِنْ أَهْلِهَا مَكَانًا شَرْقِيًّا)
وبقي سيدنا زكريا كل ميدخل عليها المحراب يلاقيها بتصلي.. لا دة بيلاقي ايه كمان ؟
>>>>> كل ما يدخل يلاقي عندها رزق بقي يلاقي فاكهة الصيف في عز الشتاء وفاكهة الشتاء في عز الصيف رغم انها مخرجتش بره غرفتها ويلاقي عندها اكل كتير…
فيسالها يا مريم منين جبتي دة ؟
فتقوله هو من عند الله.
(كُلَّمَا دَخَلَ عَلَيْهَا زَكَرِيَّا الْمِحْرَابَ وَجَدَ عِنْدَهَا رِزْقًا ۖ قَالَ يَا مَرْيَمُ أَنَّىٰ لَكِ هَٰذَا ۖ قَالَتْ هُوَ مِنْ عِنْدِ اللَّهِ ۖ إِنَّ اللَّهَ يَرْزُقُ مَنْ يَشَاءُ بِغَيْرِ حِسَابٍ).

طب ليه في الآية هنا قال زكريا بالذات ؟
لان زكريا هو اللي كان بيكفلها… يعني ايه ؟
بعد موت ابوها عمران .. وامها طبعا كبيرة في السن .. بقوا يتخانقوا مين اللي يكفلها لان ابوها كان معلمهم وكان من كبار علماء بيت المقدس.

فاتفقوا انهم هيقفوا عند النهر ويرموا اقلام ..
و ده وفاء لأبوها لانه كان بيعلمهم بالاقلام .. واخر قلم تيار النهر يجرفه هو ده اللي يكفلها ( يعني اخر قلم يوصل الشط ).
و رموا .. كل الاقلام تجري وقلم سيدنا زكريا يقف ف مكانه ميتحركش .. طب نعيد تاني .. برضوا ميتحركش .. لحد تالت مرة بقي كفلها سيدنا زكريا
(وَمَا كُنْتَ لَدَيْهِمْ إِذْ يُلْقُونَ أَقْلَامَهُمْ أَيُّهُمْ يَكْفُلُ مَرْيَمَ وَمَا كُنْتَ لَدَيْهِمْ إِذْ يَخْتَصِمُون)….
وبدأت مريم تشوف الملائكة وتخاطبهم كمان..
(وَإِذْ قَالَتِ الْمَلَائِكَةُ يَا مَرْيَمُ إِنَّ اللَّهَ اصْطَفَاكِ وَطَهَّرَكِ وَاصْطَفَاكِ عَلَىٰ نِسَاءِ الْعَالَمِينَ)
دي كمان بقت تشوف سيدنا جبريل .. و دي منزلة عالية جدا..
دلوقتي خلاص ستنا مريم بقت جاهزة للمعجزة
التكملة بكرة باذن الله
رمضان كريم وكل يوم حكاية.