انتي فين ؟
راندة محمود
انتي فين ؟بناديكي
وبدعي ربنا يخليكي
تعالي مدي لي ايديكي
خديني في حضنك
واحكي لي حكاويكي
عندك كل الاخبار
كنتي بير الاسرار
بيتك قبلة ومحراب
ومفتوح على وسعه الباب
الكل واقف ع الاعتاب
يتمنى يراضيكي
عايزة اشتكيلك قربي
واسمعك بتقولي لي
حسبي الله في اللي يأذيكي
ليه دلوقتي بتهربي
تعبناكي لحد ما استسلمتي
ونحل عودك و سلمتي
وبقيتي تطلبي الرحيل
وأنا عايزاكي تستني كتير
وتعيشي العمر الطويل
كنت فاكراكي
ح تعيشي على طول
الأم ما ينفعش تمشي
والبيت يبقى مقفول
ونوره ينطفي
وما ينفعشي
انادي عليكي
وألف حواليا أدور
أسأل بعيوني عليكي
وأتصور
انك في كل حتة
على سريرك
على كرسيكي
في مطبخك
واقفة على رجليكي
ولما مش بلاقيكي
بلاقي عيوني لوحدها
بتبكي عليكي
