مالك يا فلسطين؟
راندة محمود
مالك يا فلسطين؟
صوتك ليه حزين؟
شوارعك ليه فاضية و ساكته؟
وفيكى كل يوم الف عركة
جوه القلوب
خناقة من غير صوت
وجعك مالوش حدود
ابنك فى يوم العيد يتيم
واللئيم
سرق لبسه الجديد
قطع زينة العيد
كل الحي لبس السواد
واعلنوا فى كل البلاد
ان اليوم مش عيد
اليوم حداد
على الشاب اللى مات
ما فيش حد وقف معاه
اه يا شعب مات و تاه
لازم كل ولاد العرب
تقلع لبس العيد
تصلى الصبح على روح الشهيد
كل ام عربية تربط طرحة على راسها
وتاخد العزا
الشاب اللى مات ده ابن كل الامهات
خفنا عليه و هو بيضرب بالحجارة
شيلنا همه و هو فى المعتقلات
خدناه فى قلوبنا من كل حارة
خبناه فى روحنا مع كل شهقة خوف
رغم البعد ورغم الظروف
ورغم الفرقة و البعاد
ح نعلن اليوم الحداد
وحدنا الحزن على الولاد
لازم يعرف اللئيم
ان الجنازة ميلاد
و ان العزا ..عزا الجلاد
وان ابنى كما العنقاء
لو اترمى فى النار واتحرق
يرجع طاير م الرماد
