حياة جديدة
سحر أبوالعلا
علي.. بس انا خايف بباكي ميوافقش عليا يا منة
منة.. وليه بس مش هيوافق
علي.. ازاي يعني في اب هيوافق يجوز بنته لطالب لسة بيدرس ولا عنده شقة ولا شغلانة ثابتة ده انا بشتغل كاشير في مطعم عشان اقدر اصرف على تعليمي يا منة
منة.. يا سيدي تعالى انت بس وملكش دعوة
علي.. امري لله هاتي رقم بباكي عشان أكلمه واخد منه ميعاد ولو رفض هيبقى معاه حق والله
في البيت
عبدالله… يا منة
منة.. نعم يا بابا
عبدالله.. تعالي عاوز اتكلم معاكي
منة.. اتفضل يا بابا
عبدالله.. انتي تعرفي حد اسمه علي
منة سكتت
عبدالله.. تبقي تعرفيه
منة.. الحقيقة يا بابا
عبدالله.. الحقيقة ايه بقى طبعا منة حبيبة بابا مش هتخبي على بابا حاجة
منة.. الحقيقة يا بابا علي زميلي ومعجب بيا ولما كلمني قلت له لازم يكلم حضرتك الأول
عبدالله.. يعني علي بس اللي معجب بيكي وانتي لا
منة.. الله بقى يا بابا
عبدالله.. خلاص يا روح بابا انا فهمت وعموما انا اديت علي ميعاد يوم الخميس بعد صلاة المغرب
يوم الخميس
علي بيدق الباب، عبدالله فتح الباب ورحب بعلي ودخله الصالون.
عبدالله.. أهلا وسهلا يابني
علي .. اهلا بحضرتك يا عمي، في الحقيقة يا عمي انا كنت جاي اطلب منك ايد منة بنت حضرتك بس
عبدالله.. بس ايه يا ابني
علي.. الحقيقة يا عمي انا ظروفي يعني
عبدالله.. بص يا علي يا ابني انا طبعا مكنتش هدخلك بيتي غير لما اسأل عليك واعرف انت مين واعرف عنك كل حاجة.
علي.. انا عارف يا عمي أن ظروفي متأهلنيش اني ارتبط دلوقتي ومكنش ينفع اني اجي واقعد مع حضرتك وانا مش جاهز
عبدالله.. بص يا ابني انا عرفت انك يتيم وانك كنت قاعد مع جدك وجدتك الله يرحمهم وانك بتتعلم وبتشتغل عشان تصرف على نفسك وده شيء كويس في حقك، لكن الأهم عندي انك راجل ملتزم وحافظ لكتاب الله وكلنا بدأنا في الأول كدة، انا معنديش غير منة جنبي انا وامها هدية من ربنا بعد ١٥ سنة صبر وفي النهاية كل حاجة بتاعتنا انا مش هقولك اني راجل غني بس الحمدلله الحال عال وانا موافق على جوازك من منة لاني مش هلاقي لمنة راجل احسن منك، انت هتسيب شغلك وتجي تشتغل معايا في التجارة بتاعتي واهو يبقى ليا سند بدل ما انا لوحدي كدة، وان كان ع الشقة البيت اهو كبير وانا وام منة كنا خايفين يوم ما تتجوز منة وتسيبنا فياريت بقى تقبل تتجوزا معانا هنا
علي.. معقول يا عمي انا مش عارف اقول لحضرتك ايه
عبدالله.. قول موافق
بعد شهر
علي.. معقول يا منة انا مش مصدق أننا اتجوزنا
منة.. مش قلت لك انت بس تنوي خير وسبها ع ربنا
علي.. انا بحبك اوي
منة .. وانا بحبك اوي اوي
بعد سنتين علي ومنة اتخرجوا وشغل عبدالله كبر بفضل ربنا ومجهود علي ومنة جابت بيبي بنوتة جميلة واسمها جميلة وبدأت رحلة جديدة في حياة جديدة.
