اول ضمة …وآخر ضمة
راندا محمود
أول ضمة يااما
يوم ما اتولدت
قعدت في حضنك
بين دقات قلبك
بوم ..بوم ..بوم
ساعتها ارتحت
قالولي دى أم
ولازم اصاحبك
ومن يوم ما عرفتك
بيتى فى حضنك
راحتى فى حضنك
أمنى فى حضنك
أول ضمة قالتلى
دى الحنان
دي الإيمان
دي الرحمة من الرحمن
أول ضمة يااما
كانت طويلة
مش يوم وليلة
ده عمر …زماااااان
أول ضمة يااما
كانت فى الجنة
وكانت للجنة
طريق و صراط
علامات …اشراط
أول ضمة يااما
مع طولها انتهت
العيون دبلت غمضت
ولاقتنى خلاص
بسيب إيديكي
بودعك و بقفل عنيكي
وبضمك
آخر ضمة يااما
ح اسيب خلاص الجنة
منها انطردت
زى آدم و حوا خرجت
وزي آدم و حوا
فضلت احن
من وجعى بئن
يا ريتني فضلت
في جنتك
تشبثت جدرت
ببص ورايا
سنين طويلة تعبت
تعبت من خذلاني
من نسيانى
وحججي و كسلى
وثقتي فى ايامي
اكيد ح يجي يوم تانى
إيه يعني إني مش فاضي؟
إيه يعني ياخدني النوم؟
لحد آخر يوم
ولما ادركت
لاقتنى تركت
تركت حضنك
ما بقتش الصغير ابنك
كبرت يااما كبرت
ح اعمل كل حاجة وحديا
ما فيش ايد ح تطبطب عليا
ولا بال ح يفكر فيا
ولا فيه حضن ح يسعني
حتى و لا حضن ولادى
ولما ح يجي ميعادى
ح ادور عليكي
ح اناديكى
ومش ح الاقيكى
ح استنجد بيكي
تعالى يااما
ضمينى آخر ضمة
بس عيونى ح تقفل
و الدنيا ح تبقى عتمة
و ح تفتح عيونى
على دنيا تانية
ح اكون فيها برضه وحديا
يا ح امشى فيها مستقيم
يا اتعثرت
ساعتها ح اقول
يا ريتني كنت كترت
في آخر ضمة
