نموذج مصري من ملايين النماذج المصرية متابعة /غادة شكرى. “نبيهة عبدالحميد” وشهرتها “ماجدة” سيدة مصرية انفصلت عن زوجها من 12 سنة وعندها بنتين هما “شهد” في الصف السادس الإبتدائي، و”دينا” في الصف الثالث الإعدادي.. بعد الإنفصال الظروف أجبرت “ماجدة” إنها تكون الأم والأب في وقت واحد للبنتين ورغم إن ده يبان صعب في بدايته لكن مفيش شيء صعب على سيدات مصر اللي كل واحدة منهم بتكتب قصة كفاح بحروف من دهب محدش يعرف عن تفاصيلها أى حاجة.. عملت إيه؟..
قررت تجيب تروسيكل وتشتغل عليه!.. بتقول “ماجدة” في حوارها مع الصحفي “محمد الجرتلي”: (اتعلمت قيادة الترويسكل خلال فتره قصيرة وكل يوم بعد صلاة الفجر بطلع للوكالة عشان أنقل الخضار والفاكهة للبياعين والتجار الكبار، وبعدها برجع للبيت بسرعة عشان أحضر الفطار لبناتي عشان يتحركوا على مدرستهم، وبعدها بطلع الساعة 11 الصبح عشان أبيع المناخل والسبته لحد نهاية اليوم في القرى اللي حوالينا)..
رغم إن اليوم 24 ساعة بس ويبدو إنه مدة قليلة عشان تقدر تعمل فيه كل ده لكن هي قدرت توفق بين كل الحاجات دي بشكل سلس رغم صعوبتها.. “ماجدة” اتعرضت في الأول لمضايقات من بعض الناس اللي كانوا بيستغربوا فكرة شغل سيدة بالشكل الشاق ده لكنها اتغلبت على كل ده باستمرارها في اللي بتعمله وهي راضية مادامت في النهاية هتقدر توفر لقمة عيش حلال لبناتها..
نموذج مصري من ملايين النماذج المصرية العظيمة اللي بتعمل عظمة وإلهام كل يوم من خلال السعى والكفاح المحترم والشغل اللي بضمير.. كل التحية للسيدة العظيمة “ماجدة”.
