كتبت/غادة إبراهيم
فيه حاجة في الست دي يخليك تشوفها كأنها حد قريب منك .. أمك .. خالتك .. حد تعرفه .. الست الجميلة دي .. هكتب عنها بشكل مفصل .. بس مش دلوقتي ..
بحب قوي دورها في فيلم “عائلة زيزي”، وازاي كانت عاملة الدور بعبقرية .. ولما كانت بتقول لو مصيبة واحدة كانت تهون .. لو اتنين نقول ماشي .. لكن تلاتة يا رب .. فترد عليها زيزي وتقولها اربعة يا ماما .. فتقول صبرني يا رب.
عقيلة راتب اول واحدة في مصر تتلقب بالسندريلا .. قبل سعاد حسني .. وكانت وهي صغيرة جميلة جدا .. جدا جدا .. فكانت بطلة لكتير من الافلام .. لكن للاسف الافلام دي اتحرقت ..
عقيلة اتجوزت من المطرب حامد مرسي .. واللي 90% من الناس ميعرفهوش .. حامد مرسي كان لقبه بلبل مصر الوحيد .. عارف شهرة حليم هو كان قدها عشرين مرة .. وكانت الستات بتعشقه .. وهو اتجوز عقيلة .. وخلف منها بنتهم الوحيدة أميمة.
عقيلة عملت مسلسل مهم قوي في بدايات التلفزيون اسمه عادات وتقاليد .. وصل لـ 400 حلقة .. وكانت عاملة شخصية مهمة قوي .. اسمها شخصية حفيظة هانم .. ويمكن ناس كتير ميعرفش ان صوتها كان حلو وكانت بتغني..
عقيلة كانت بتصور فيلم اسمه المنحوس عام 1987.. وهي بتصوره فقدت بصرها .. وكان فاضل كذا مشهد .. فصممت تصورهم .. وهي كدا .. ومحدش خد باله انها فقدت بصرها .. وبعدها اعتزلت الفن وقعدت في بيتها مع بنتها .. لحد ما ماتت 22 فبراير 1999…
الله يرحمها <3 في حب عقيلة راتب
#بهاء_حجازي
