رثاء ضحايا كنيسة أبو سيفين
بقلم/ إيڨيلين موريس
قلوب البشر تعبت
فيها الكتير
فيها الآلم والضني
فيها حريق كبير
دايبه القلوب من الوجع
بايشة من الأحزان
علي أحلام الولد
اللي مات قبل الأوان
توأم في يوم اتولد
والروح سكن فيهم
وف لحظه جت النار
خنقت حكاويهم
ماتت الأجساد
و بقيت أساميهم
رجعت الأرواح
لحضن باريها
خرجت في عز نهار
تستوطن اراضيها
وسابت لنا ذكري
أليمة نحكيها
وفرح كبير في السما
بنفوس أمنت بفاديها
