انا اللى باجى اكلمك بنسى الكلام
انا اللى لما بابص لك
قلبى بيدعى ويدعى كتير
وافتكر اللى دخل جنته
وما قلش ما شاء الله
قلبى يدعى دعوته كأنه صلاة
ما شاء الله ….ما شاء الله
هو ده اللى كان قد حبة الفول
امتى بقى بهالطول
امتى صوته تخن وهو بينادينى
يا حاجه هاتى ناولينى
وبعدين يضحك عليه
يقولى كده يا حاجة مش طايله
مش انا دلوقتى بوطى احضنك
فاكرة لما كنت اشب
واعمل نفسى ح ابوسك
وازعق فى ودنك واقولك توت
تجرى ورايه وتضربينى بالشلوت
امتى الوقت عدى بالسرعة ديه؟
امتى بقيت سندى
بعد ما كنت بتسند عليا؟
دلوقتى وانت واقف تصلى جنب ابوك
عيونى من وراكم بيضموك
نفسى كان ربنا خلقنى بالف قلب
عشان كلهم ح يحبوك
ولما اشوفك يا جنتى
كل قلب فيهم ح يردد صلاة
ما شاء الله …ما شاء الله….ما شاء الله
راندة محمود
