بمقص و خيط
بمقص وخيط وورق جلاد
أنا جاي معاكم ف المعاد
انظم الطابور اعوض الشهور
اللى قلبى كان مستنى
فيه رمضان ينعاد
قلبى كان بيحن
و يفتكر الذكريات
ولمة الولاد
ف دخلة كل بيت
والزينة اللى على الحيط
ف قلب الشوارع
آه لو العمر راجع
كنت آجى تانى
بمقص وخيط و ورق جلاد
اتفرج ع الصحاب
بيخبطوا على كل باب
عشان يعلقوا الزينة
فى مناشر الغسيل
و انادى ع الولاد
ثبت هنا وارفع هناك
عدي السلم بشويش
لحسن تقيل
فات زمن طويل
وأهو رمضان عاد
بس فين الولاد
فين ابويا فين الجيران
فين الراديو بتاع زمان
فين وقفة امى
فى البلكونة
فين البيوت المسكونة
بناس مدفية المكان
وجه رمضان
ووقفت فى دخلة بيتنا
فى ايدى مقص و خيط وورق جلاد
قالولى ارمى من ايدك
الزينة اهيا معمولة
كل حاجة بنشتريها بسهولة
ما حدش ح يعمل وياك
ارمى من ايدك
محدش من اللى تعرفهم
بيستناك
انت تعرف حد هنا
كلهم ناس جداد
ارجع لبيتك و اتفرح
م الشباك
وافتكر الذكريات
راندة محمود
