انا فاكرة
بقلم/ إيڤيلين موريس
أنا فاكرة بيتنا بتاع زمان
فاكرة أمي و الجيران
وفاكرة ضحكة العيون
اللي غمضت فيها الجفون
وفاكره كمان صوتها الحنون
والطبطبة وسط الهموم
فاكرة
فاكرة يوم تعبت عنيا
جت لي جري بفطيرة دافيه
قالت حبيبتي كُليها
عافيه
حاجات كتير فاكرها عقلي
حفرت في قلبي ذكري غاليه
لكن يفضل اليوم الحزين
وأنا قلبي متشعلق ويا العيون
رافضة أصدق إنك مسافرة
حتسيبي بيتنا
خلاص
مهاجره …
وأنتي في صمتك ملاك
رجع السما لما آون الآون
ساب الحزن لأرضنا
ودمعه تجري علي خدنا
وسنين تعدي علي حزننا
إنطفت فيها شمعة
كانت في يوم
بتنور دربنا
ودي مش كل الحكاية
حكايتها باقيه لـ مالا نهايه
لأنها أمي
أصل الحياة من البداية للنهاية
