مش كل حاجه حلوة لازم تدوم
بقلم د / نجوان حسنى
وإنت ماشى فى دنيتك حتقابل ناس فى سكتك
مش لازم يكونو أزمتك
هتتعلم من الناس إللي جرحتك وخذلتك ..وهتشوف الدنيا وهي بتدور وتعلمك إن الشيء الوحيد الأكيد إن مفيش حاجه بتدوم !!
اللى جرحك حتشوفه مجروح ،
واللى قهرك لازم حتشوفه مقهور، واللى باعك مش حيعرف تانى يشتريك ،
وانت ماشى فى سكتك هتتعلم حاجات كتير ..
. هتتعلم إن في ناس هتكون مراحل في حياتك هتيجي لغرض وحتختفى لانك خلاص
اتعلمت وفهمت ازاى تسند نفسك ، ومحدش حيقدر يشدك ، لأنك ببساطه فهمت واستوعبت ان مافيش حاجه بتدوم،
وانت ماشى فى سكتك هتتعلم مين إللي تبكي على كتفه وهتتعلم إن سعات لازم تمسح دموعك بإيدك !!
هتتعلم تحب وهتتعلم تفارق وتفقد جزء من روحك ..
هتتعلم يعني إيه ثقة ويعني إيه جدعنه واصول والدروس دي هتتعلمها من الخاين والندل وقليل الاصل قبل الصاحب الجدع ابن الاصول..
هتتعلم إن في ناس في حياتك مينفعش تسيبها لازم تتبت فيهم بإيدك وسنانك علشان الناس دي مبتتعوضش..وهتتعلم إنك سعات لازم تفسح الطريق للي عايز يمشي..وإنت قلبك راضي وماشي في سكتك !!
هتتعلم من الأحياء وهتتعلم من الأموات..هتتعلم من العالم وهتتعلم من الجاهل..هتتعلم من راجل مسن وهتتعلم من طفل صغير…هتتعلم من تجارب إللي حواليك
ومن أكبر الحاجات الي لازم تتعلمها إنك تسامح نفسك وتسامح إللي حواليك..وتتعلم إن أكبر كنز لك هي أعمالك الخالصة لله..وإن كان اتكتب عليك تعافر..ف ربنا يكتب لك إنك تعافر في السكة الصح ومع الناس الصح وعلشان الهدف الصح
