تجاعيد
سحر ابوالعلا
تجاعيد وشوشنا حكاوي
تتقال مواويل وغناوي
تجاعيد وشوشنا قصص
يحتار فيها الراوي
تجاعيد وشوشنا سنين
ما بين حنين ولقا
تجاعيد وشوشنا خطوط
دي ضحكة ودي آهة
تجاعيد وشوشنا أحباب
فارقونا بلا راجعة
عجزنا بفراقهم
مع إننا لسة شباب
تجاعيد وشوشنا أصحاب
فارقونا بلا أسباب
ومابين سؤال جواب
زادت تجاعيدنا
تجاعيد وشوشنا صور
ألوانها بهتانة
والضحكة راحت فين
هربت وسايبانا
تجاعيد وشوشنا مرايا
بنشوف فيها احنا
ما بين زمان واليوم
زمانا جرحنا
تجاعيد وشوشنا ذكريات
ملّخص كل اللي فات.
