رسالة من العالم الآخر
سحر ابو العلا
فجأة وبدون مقدمات تليفوني شاشته اتحرقت ومكنش وقته خالص بصراحة أنا كنت لسة بادئ شغلانة جديدة وحاطط فيها كل الفلوس اللي معايا، فقلت خلاص اجيب تليفون صغير كدة مستعمل امشي بيه حالي لحد ما ربنا يفرجها، ورحت لواحد صحبي عنده محل صيانة موبايلات قلت له أنا عاوز تليفون صغير استعمال امشي بيه حالي اليومين دول، طلعلي تليفون صغير قال لي التليفون ده لسة جاي لي من شوية خده ولما تجيلك فلوس هات أي مبلغ مش هنختلف يعني، خدت التليفون وقلت له التليفون ده عليه أي ارقام أو أي حاجة قال لي لا أنا لسة عامله سوفت وير وماسح كل حاجة كانت عليه
خدت التليفون وروحت البيت كنت ميت من التعب والوقفة طول اليوم أكلت لقمة وحطيت التليفون جنبي ونمت على طول بعدها بشوية صحيت على صوت التليفون مكالمة من رقم غريب معرفهوش قفلت الخط ونمت والتليفون مرنش تاني، بس لما صحيت من النوم لقيت رسالة من نفس الرقم اللي رن عليا وانا نايم الرسالة فيها جملة واحدة (كوبري اكتوبر) مركزتش في الرسالة وقضيت يومي عادي وخلصت شغلي وروحت البيت وانا قاعد بشتغل ع اللاب التليفون رن تاني نفس الرقم المرة دي رديت بس مكنش فيه حد ع الخط قفلت التليفون وقلت ده أكيد حد بيهزر ولا بيتسلى، وقعدت اخلص شغلي وانا بشتغل فيه حاجة غريبة حصلت لمحت خيال بنت معدية في الصالة مع اني عايش لوحدي أصلا
وبعدها سمعت صوت نغمة رسالة ع التليفون بصيت لقيت نفس الرسالة من نفس الرقم ( كوبري اكتوبر) بدأت اقلق وقلت بكرة الصبح هروح الفرع بتاع شركة الاتصالات اسأل عن صاحب الرقم ده، وصحيت تاني يوم ونسيت من زحمة الشغل، ورجعت البيت واتكرر نفس اللي حصل امبارح مكالمة التليفون ومحدش بيرد بعدها شوفت نفس البنت تاني خيال معايا في الاوضة وبعدها جت لي نفس الرسالة، قلت لنفسي لا الموضوع كدة يقلق وفيه حاجة غلط أنا لازم اروح شركة الاتصالات بكرة، وفعلا أول حاجة عملتها تاني يوم الصبح قبل ما اروح الشغل رحت شركة الاتصالات وسألت عن الرقم وهوية صاحبه لكن للأسف الرقم طلع مش متسجل بإسم حد، خلصت شغلي اليوم ده وصحبي قالي تعالى نقعد ع القهوة شوية ورحت معاه فعلا وسهرنا شوية وبعدين روحت علشان يحصل تاني نفس اللي حصل في الليلتين اللي فاتوا
بس في الليلة دي بدأت تحصل حاجات غريبة حاجات بتتحرك من مكانها وفي وسط شغلي شاشة اللاب تقفل وتفتح لوحدها وبعدين الاقي عليها نفس الرسالة(كوبري اكتوبر) قلت
ده أكيد فيه حد عاوز يبلغني حاجة من خلال الرسالة دي، رحت تاني يوم لصاحبي اللي اشتريت منه الموبايل وسألته مين اللي باع لك الموبايل ده قال لي إنه فيه شخص جه واداله التليفون وكان مرتبك في كلامه واداله التليفون واخد الفلوس من غير فصال في السعر ومشى ع طول سألته لو عنده تسجيلات فيها الشخص ده قال لي للأسف اليوم ده كانت الكاميرات عطلانة فيه، قضيت طول اليوم وانا مش مركز في شغلي كل تركيزي في الرسالة ومين صاحبها وايه علاقتها بالبنت اللي انا بشوفها وايه علاقتها كمان بالشخص اللي باع لصحبي الموبايل، اسئلة كتير في دماغي، مخلصتش شغل وروحت البيت وفضلت قاعد مستني البنت دي تظهر يمكن المرة دي تديني إشارة افهم منها أي حاجة، فضلت مستني بس من تعبي نمت وانا قاعد بس حلمت بالبنت دي وخدتني من ايدي ومشيت معاها لحد ما وصلنا عند كوبري اكتوبر ووقفت بيا ادام محل شكلة قديم وسابتني ومشت صحيت من النوم مخضوص قعدت افكر في اللي حصل في الحلم ويا ترى إيه علاقته بالبنت دي، تاني يوم سيبت شغلي وركبت ورحت عند كوبري اكتوبر ونزلت ومشيت في نفس الشارع اللي كان في الحلم والمفاجأة إني لقيت الشارع زي ما كان في الحلم بالظبط حتى المحل القديم لقيته بس كان مقفول بقفل قديم كأنه متفتحش من سنين، سألت صاحب المحل اللي جنبه قال لي إن المحل ده كان بتاع راجل كبير وتوفى ومن وقتها وهو مقفول وابنه مسافر، سألت الراجل انت متأكد ان مفيش حد فتح المحل ده خالص من بعد وفاة الراجل صاحب المحل، قال لي ان كان فيه شاب بيشتغل في المحل وهو الوحيد اللي كان معاه مفاتيح المحل بس مش عارف لسة معاه بعد وفاة الراجل ولا لا، سألته طيب انت مشوفتش الشاب ده من بعد وفاة الراجل صاحب المحل، قال لي الصراحة مش فاكر يمكن عدا مرة أو مرتين بعدها، سألته طب كان فيه بنت شغالة معاهم قالي لا مكنش فيه غير الشاب ده والحاج صاحب المحل، قربت من باب المحل شميت ريحة غريبة طالعة من جوة، قلت للراجل انت متأكد ان مفيش حد بيدخل المحل ده خالص، قال لي يابني انا قاعد هنا طول النهار، بس بعد ما بروح الله اعلم باللي بيحصل، روحت البيت وحلمت نفس الحلم بس المرة دي وانا واقف ادام المحل أنا والبنت دي لقيت في خيط دم طالع من تحب باب المحل لبرة،
وبعدها سابتني ومشيت، تاني يوم قلت أنا لازم اروح اعمل بلاغ بس قلت لنفسي هعمل بلاغ بإيه ومين هيصدقني، ده مش بعيد اللي يسمع كلامي ده يقول عليا مجنون، رحت شغلي وانا مكرر مش هفكر في الموضوع ده تاني، بس حصل حاجة وانا في الشغل جات لي رسالة تانية من نفس الرقم بس المرة دي مكتوب فيها (المحل، سارة، أحمد) قلت يبقى أكيد سارة ده اسم البنت اللي بشوفها يمكن عاوزة تقولي حاجة متعلقة بيها جوة المحل ده، قلت لنفسي لا لازم اروح ابلغ واللي يحصل يحصل، رحت القسم وقدمت بلاغ باختفاء بنت اسمها سارة انا معييش أي بيانات غير اسم معرفش حتى ده اسم حد موجود فعلا ولا لأ، امين الشرطة بعد ما سألني وحكيت له اللي حصل قالي روح يابني انت باين عليك يا مجنون يا بتتعاطى حاجة روح بدل ما ادخلك الحجز، روحت وانا فكري مشغول بسارة والحلم والرسالة، لكن فكرت إني تاني يوم هروح المحل تاني يمكن الاقي أي خيط يوصلني لحاجة، وفعلا رحت للحاج صاحب المحل اللي جنبه وطلبت منه ابص على تسجيلات كاميرات المراقبة عنده في الفترة اللي فاتت، الراجل خاف ورفض في الأول بس بعد ما حكيت له اللي بيحصل معايا من ساعة ما اشتريت الموبايل وبعد ما رحت المحل والريحة الغريبة اللي طالعة من جوة قالي انا هاجي معاك القسم وهشهد باللي حصل وهما ساعتها ييجوا يفتحوا المحل ويشوفوا كمان كاميرات المراقبة، رحنا أنا والحاج والمرة دي قدمنا بلاغ بكل اللي حصل وهو شهد معايا بموضوع الريحة الغريبة دي، وفعلا جه معانا امين الشرطة ومعاه أمر من النيابة بفتح المحل وتفتيشه عشان تظهر المفاجأة الكبيرة وجود جثة بنت داخل المحل وبعد الفحص والتحقيق والبحث عن هوية البنت عرفوا انها إسمها سارة فعلا ومن تفتيش تسجيلات كاميرات المراقبة اكتشفوا ان سارة كانت على علاقة بالشاب اللي كان شغال في المحل وانه استدرجها لداخل المحل في الليل بغرض سرقة مصوغاتها ولما قاومته قتلها وسرق الصيغة والموبايل بتاعها وراح باعه لصاحبي عشان اشتريه انا وتكون رسالة سارة لي من العالم الآخر هي بداية كشف الحقيقة وبعد القبض على أحمد العامل بالمحل اعترف بجريمته وتم استخراج الجثة ودفنها، سارة جتني بعدها في الحلم بس وهي بتبتسم لي المرة دي ودي كانت اخر مرة تزورني فيها سارة.
