همسة وعي 

همسة وعي 

بقلم/رانيا ابوالعلا 

محتاجين نستشعر و نتأمل نعم ربنا في حياتنا

كتير ممكن نتسأل عن نعم ربنا او نقعد مع نفسنا ونقول الحمد لله علي نعم ربنا

طب ايه هي النعم دي

المعظم هايتكلم عن الحواس الخمسة واني بقدر اتحرك واشوف طلباتي وطلبات اولادي

كل ده صح وجميل

لكن في نعم تانية كتير في حياتنا واحنا عشان اعتادنا عليها نسيناها او شايغين انها مش نعمة اصلا وانها شئ عادي

ده حتي العادي طلع نعمة كبيرة اووي اللي لما حد يسألنا عاملين ايه بنرد بطريقة فيها عدم اهتمام ونقول( عادي)

في نعمة مهمة اوي هي الامان انك تكون عايش امن ومطمئن دي نعمة كبيرة وده مش معناه اننا الحمد لله عشان مش في حرب زي دول تانية لكن امن جوه بيتك تخيل لو شباك عندك اتكسر وخايف حشرات تدخل او حرامي ينط تخيل شباك بيتك المقفول ده امان ونعمة كبيرة احنا مش حاسين بها

صحتك نعمة ومرضك كمان نعمة خفف عليك بها عذاب في الأخرة وجود زوج او زوجة في حياتك نعمة

اولادك نعمه واخواتك نعمة عيلتك وبيتك نعمة امك وابوك اكبر نعمة وطيبة قلبك نعمة صاحبك اللي بيسندك وقت شدتك نعمة ده حتي الخذلان نعمة بيدي لك درس تتعلم منه طول حياتك

الناس اللي بتحبك نعمة ولو حد بيكرهك بردو نعمة لو انت انسان كويس بيكون ده اكبر دليل منه انك احسن منه

عقلك نعمة وراحتك نعمة ومشاكلك نفسها نعمة بتعلمك و بتزود وعيك وتوسع مداركك

يومك العادي نعمة انه مر بسلام من غير شئ مش عادي يتعبك

نتمني السقعة والشتا يجي ولما تبقي الايام ورا بعض كلها بالشكل ده نزعل ويوم ماتطلع الشمس نفرح بها جدا ونقول الله اخيرا الشمس طلعت رغم انها كانت موجودة طول فصل الصيف وبنتذمر ونزعل منها ولما غابت فرحنا بها عشان هي نعمة من نعم ربنا علينا وبتدفينا بس اعتادنا عليها

والشتا والمطر نعمة بتسقي الزرع اللي بناكل منه بكل الوانه وانواعه صيف وشتا

حياتنا نفسها نعمة اللي بنعيشها كل يوم وشايفين انها عادي اهو عايش وخلاص مجرد انك عايش دي نعمه مش وخلاص ولا حاجة كل اللي ماتوا بيتمنوا يوم زيادة في عمرهم يصلحوا به حاجات كتير عملوها في حياتهم وكانوا بيقولوا عادي اهو عايش وخلاص وعرفوا قيمة اليوم الواحد وهو عايش يعني ايه

حياتنا نعمة

وانك بتقرأ الكلام ده دلوقتي وبتفهمه ده كمان نعمة

استشعر نعم ربنا في كل حاجة موجودة حواليك وما تستصغرش ولا تقلل من قيمة اي حاجة مهما كانت بسيطة فهي نعمه كبيرة

استشعروا

“و لقد مننا عليك مرة اخري”

“وان تعدوا نعمة الله لا تحصوها”

‏اللهم لك الحمد ملأ كل شيء وعدد كل شيء، يارب اجعلنا من الشاكرين الحامدين.