النهاردة و بكرة
راندة محمود
اختفت من الصورة
ناس كتير
ما هي سنة الله التغير
ناس بتتولد
و ناس بتموت
وتبقي صغير
والعمر يفوت
وتعاشر ناس وترحل
وياما بتفضى
و تتقفل بيوت
وياما تشوف بيوت
الضحك ماليها
وتاني يوم
يسكن الحزن فيها
النهاردة فرح
لابس توب الزفاف
و بكرة يتلف بسواد
منه تخاف
النهاردة بتحب فلان
وبكرة بيختفي
وغيره بيبان
النهاردة مفتوحة
على آخرها البيبيان
وبكرة محطوط
ع الباب ألف قفل
واللي كان امبارح طفل
بكرة بيبقى راجل
وشعره يشيب
وتلف الدايرة
وده مش عيب
امبارح ذكرياتك
والنهاردة حياتك
وبكرة في علم الغيب
في ايدك راياتك
بترفعها وتسلمها
واحدة واحدة
لحد الراية الأخيرة
وتخلص مشاهدك
وتنزل ستارة كبيرة
وهوووووووووووب
بعد الأ كشن
يبقى ستوووووووووب
