زمن تاني
رندا محمود
آه يانى من طيبة قلبي
اللى مغلباني
عايش زمانى
باخلاق زمن تاني
بعرف العيب و الحرام
وبقشعر لو جه قدامي
وبقدر قوي الاحترام
وبحترم الاصول بزيادة
وانا فى العادة
بدي للكبير مقامه
والمعلم بقف انتباه امامه
وان صرخت فى يوم فتاه
و قالت و امعتصماه
تلاقيني جيش قدامه
بعرف فى الشهامة و النخوة
بقدر قيمة الأخوة
بحب لمة العيلة
وقعدة الجيرة الجميلة
بس أنا دلوقتى فى حيرة
وبتلفت يمين و شمال
مش لاقي حد شبهى
ولاحد بيربي العيال
ضاعت القدوى و المثال
وتهد التمثال
وبقيت فى زمن غريب
اختلط الصح بالعيب
زمن بيدافع عن القاتل
و بيحاكم الضحية
زمن مش ليا
زمن مالكش دعوة
و خليك فى حالك
اشمعنى انت
ما يجيبوا حد بدالك
زمن صباح الخير يا جاري
انت فى حالك و انا فى حالى
مهما يحصلي أو يجرالي
مش ح لاقي حد يسأل عليا
زمن الأخ بيكره اخوه
والمدرس مد اديه
واتباعت الذمم بجنيه
والصدقة بقت بمعايرة
والنصيحة ع النت فضيحة
والايدين بقت مش طايلة
والأخلاق الواطية عالية
وأنا و الزمن ده
مش فاهمين بعض
واهو مجلس و بكرة يتفض
وترجع الدنيا لمجاريها
عشان نعرف نعيش فيها
عيش مريح
عشان فى الآخر
لا يصح الا الصحيح
