مسحــــــــــراتي
بقلم/ محمد هيكل
مسحراتي
قضيت حيـــاتي
بنــده و اهـــاتي …….. على خلـق نايمـه
واخدكـــــوا دور
قبــل السحــــور
إصحـي يا نـــور …….. لو بكـره صايمـه
يا حاجــــه فُــله
ماتقــومي ياللاه
مش ماشـــي إلا ……. ما تقـــولي قايمـه
ما تقوم يا عادل
و بلاش تجـادل
مافي حد فاضل ……. و لا دنيــا دايمــه
سنيـن عايشهــم
و اللي مناغشهم
لا دوقت عيشهم ….. ولا شوفت زيتهـم
عمــــــــال أنـادي
على زين و نـادي
و اقـول يا هـادي ……… على تنبلتهـــم
عمـــــال أدلــــع
ف الـواد مجلـع
و انا ضهري ولع …….. من تصحيتهـــم
بصحـي دينـــــا
و عيــال أمينـه
و حتـى مينــــا ……. بصحـي بيتهـــــم
على كعــب داير
لفيــت دوايـــــر
وعلى الســــراير ………….. مأنتخيـــن
طالقيــــن عليــا
عيـــــال شقيــه
بيـزفــــــوا فيــا ………. و مصـهــلليـــن
هلكــــان تمــللي
و لا حـد قـــاللي
طب خـد وحللي ………. ب كعكتيــــن
يا زمـــان و ودع
ولاعادش مجدع
دنـا كنت بـرجــع ………. بالشنطتيـــن
ضيعـت حـسّــي
ع الخلق أمسّـي
فا ياطبله هُسـّي …….. و ما تطبليــش
و لا تــدي رنــــه
ما راح زمـــــانـا
و استغنـــوا عنا …….. فمـا تزعليــــش
العمـــــر واحـــد
و الـرب واحــــد
مش هبقى جاحد … ومسيـري اعيـش
مـسـحــــــــراتي
و هقلـب حياتي
لـ بتـاع جيـلاتي …. ف شارع العريش
