كتبت غاده عبد الوارث
الفنان الجميل الرائع “أحمد مظهر” الله يرحمه كان عنده عادة فى أى حوار صحفي معاه أو تليفزيوني يقول قبل ما ينطق إسم أى فنانة إشتركت معاه فى أى عمل فني كلمة “الست”.. الست فاتن حمامة.. الست سعاد حسني، وهكذا!.. لما في لقاء منهم تم قبل وفاته المذعية سألته عن سبب نطق كلمة “الست” قبل إسم أى فنانة كان رده: (لإنهم ستات ستات بجد و ده أقل وصف يتنادوا بيه ده مافيش أعظم من اللقب ده يتوج معناها، ده أقل حاجة نتفق عليها كلنا كرجالة في وقتنا إن أسامينا تبقى وراهم.. كلنا كلنا، رشدي وكمال وعُمر وأنا لم نجرؤ نطلب نتكتب قبلهم، ربنا خلق الست خلقها تاج)..
طبعاً الرد بتاعه كان مبهر، لدرجة إن المذيعة قالتله: (الله يا أستاذ على كلام حضرتك طب نفسي أسأل سؤال هو إيه إللي غيرنا كده؟)..
رد “أحمد” وقال: (والله يا بنتي ما أعرف، أنا صحيت في يوم لقيت الهوا وِحِش و بطلت أشم ريحة الورد في الجنينة.. لقيت الناس ما بتضحكش في وِش بعض.. بطلوا يتلموا أول خميس من كل شهر على حفلة الست و بطلوا يكتبوا جوابات لبعض إلا في الضرورة.. بالك إنتِ الجوابات دي ليها مفعول السحر بنحضَر الكلام و بنكتبه من أرواحنا حتى العتاب في الجواب يبقى حُب)..
الفنان “أحمد مظهر” فنان بطعم ولون الزمن الجميل فى كل حاجة.. موهبته.. شياكته.. أدبه.. ذوقه.. وزي ما هو بيقول قبل إسم أى فنانة كلمة “الست” يستحق إننا نسبق إسمه بكلمة “المحترم” أحمد مظهر.. ربنا يرحمه هو وكل أيقونات السينما المصرية.
