ريحــة النــاس الغــــــلابه …. ف البساطه و ف الطيابه
ضحكة طاهره وقلب أبيض .. ودعوه رايقه ومستجابه
صحن فـول بيلــم عيـله ……… طعــم لقمتهـم جميـله
باب وبيت مفتوح ليلاتي …. ناس كريمه ومش بخيله
ناس بتعـرق طيبه صافي ….. .. قلبهـم م الحب دافي
ناس تشيـلك فوق دماغها …. بس عدي وقـول عوافي
يكرمـوك و هتبقى منهم …. … يخلعولك رمش عينهم
تلقى راحه ف كل ثانيـة …… و انت قاعد جنب منهم
مسندين فـوق الحصير …….. لمـه دافيـه و فيها خير
حتى برادهم و شايهم ………. طعم تاني و طعم غير
أي هـم ف ليـله شيلته …. هتلاقيك من القلب شيلته
تتكرم من كل واحـد … حتى ف الضحكة اللي حيلته
السنين ورده ف عنيهم ………. عمــرها ما تذل فيهم
مهما هتشوفهـم غــلابه ………… الغنــا بايـن عليهــم
أصلهـا ع الناس دي هاينه …. مهما كانت دنيـا خاينه
السماحه تشوفهــا فيهـم ……. و القناعـه بحب باينـه
خلق عايشــه ب الحلال …. خلق راضيـه ب أي حال
همه رغــم الفقــر أغنـى .. م اللي غرقوا في بحر مال
.
.
. قصيدة ريحة الناس الغلابة ف البساطة وف الطيابة
كلمات الشاعر اللواء محمد هيكل
