كتب د: سامح الهواري
الصحافه الامريكيه اليوم قامت بأبهارنا كعادتها بتناولها الاوضاع في اوكرانيا. و تحدثت الصحف اليوم بمنتهى التأثر والألم عن صعوبه الاوضاع في اوكرانيا ” بالبلدي كده ” الوضع وحش قوي يا جماعه . وأسهبت هذه الصحف في وصف المأساه بانها ما زاد الطين بله ومع الاحترام للجميع فان كون دوله اوكرانيا دوله اوروبيه متحضره فهذا يصعب الوضع على الشعب الاوكراني المتحضر ويجب على الجميع فتح الابواب والحدود وإحتضان الشعب الاوكراني في ازمته.
بالمقارنه بالشعوب الشرق اوسطيه زي مثلا العراق او افغانستان او اي دوله عربيه فهذه الدول ليست على المستوى من التحضر وطبعا دي دول بألها فتره طويله في صراعات وحوارات وتعودت على هذه الصراعات ولذلك عندما يتعلق الامر باي من هذه الدول العربيه فلن نجد الا اجابه واحده اللي هي ” انت مين ياللي انا مش عارفك ” والكل يعمل نفسه من بنها الاتحاديه .
امبارح بقي تغير موقف أغلبية دول الاتحاد الاوروبي من نشجب وندين وان شاء الله جايين الي استعدادهم لفتح الحدود لاستقبال اللاجئين الاوكرانيين .
على سبيل المثال بولندا اعلنت استعدادها التام لاستقبال اللاجئين الاوكرانيين اللي هي نفسها قبل كده قفلت حدودها ومستقبلتش اللاجئين من الشرق الاوسط ، مش بس كده ده لاعبي منتخب بولندا نزلوا بيان بيشجبوا ويدينوا روسيا وكمان بيرفضوا فيه اللعب مع روسيا في ملحق التأهل لكاس العالم ” ياه علي الانسانيه ” !!!! طب كانت فين الانسانيه دي لما كانت اسرائيل بتدك غزه بالمدافع في صيف 2019 !!؟؟ ومع ذلك بولندا لعبت ضد اسرائيل في تصفيات التأهل لبطولة امم اوروبا. عادي اهو !!!! بس ده يرجعنا لنفس النقطه وهي ان الدول العربيه بقالها فتره طويله في صراعات وحوارات وتعودت على الحياه في هذه الصراعات والحوارات وبيتعايشوا .
امبارح بأه رئيس وزراء بلغاريا أعرب عن استعداد بلاده لأستقبال اللاجئين الاوكرانيين وقال حرفيا دول مواطنين اوروبيين متحضرين ومثقفين ومتعلمين يا جماعه ” بشر درجه اولى ” ولقوا نفسهم تحت النار و استخبوا في محطات المترو ، وقال كمان هم نوعيه مختلفه من اللاجئين ‘ عكس نوعيه اخرى من اللاجئين اللي كان بيحصل منهم مشاكل ويمكن تلاقي وسطهم ارهابيين مثلا “وطبعا دول غير مرحب بيهم ، طبعا هو بيقصد للاجئين الشرق اوسطيين ” والحدق يفهم . ولكن اللاجئين الاوكرانيين مرحب بيهم في اي دوله اوروبيه .
اما بقى المستشار النمساوي اللي قبل كده تزعم إتجاه قفل ابواب النمسا في وش اللاجئين الافغان اللي هربوا بعد سيطره طالبان على افغانستان مؤخرا بيرحب النهارده بالاوكرانيين وبيريح ضميره ويقول الموضوع مختلف دول جيراننا ده علي أساس أن الجار اولا بالشفعه ، يا سلام امال يعني ما سمعناش صوتكم قبل كده في باقي الحروب ليه ؟؟؟ ولا الانسانيه لها ناسها !!! ، ولا انتوا لسه صاحيين من الغيبوبه … ولا ايه حكايتكم .. ولا ايه ولا ايه … جتكم خيبه.
تعال بقى على المجر اللي تم اتهامها بتجويع وعزل اللاجئين اللي من الشرق الاوسط قال ايه فاتحه حدودها واحضانها تماما دلوقتي لللاجئين الاوكرانيين بكل حب .
نشوف بقى الكبيره ، حتى بتوع الاتحاد الدولي لكره القدم اللي مباركين لعب انديه مستوطنات الضفه الغربيه المحتله عادي وبتسمح لأسرائيل بتنظيم بطولات اوروبيه على مستوى الشباب ، لأ وايه عاوزين اسرائيل تنظم كاس عالم 2030 !!!!!
في نفس الوقت اللي زعلوا قوي من روسيا وسحبوا منها نهائي دوري ابطال اوروبا . وكل فرق اوروبا اللي في سكه روسيا في ملحق تصفيات كاس العالم رافضين اللعب ضد روسيا . وده كله تضامنا مع اوكرانيا .
والله احنا مش ضد التعاطف مع اي دوله معذبه او تعاني من ويلات الحروب بالعكس احنا بنتفاعل جدا وبنحزن جدا لمصير هذه الشعوب ، ولكن مشكلتنا كدول العالم الثالث هي سياسه العالم المتحضر اذا صح القول اتجاه الشرق الاوسط والدول العربيه اللي هم دول العالم الثالث، هناك أزدواجيه في التعامل، طبعا الانسان الاوروبي ارقى من الشرق اوسطي. لأ والمصيبه ان في ناس سذج بيصدقوا ان هم بتوع حموم الإنسان . بجد يا جماعه فعلا الانسان درجات بردوا ، وحقوق الانسان والانسانيه المعذبه نفس الشيء درجات بردوا .
