الامريكان ، المتغطي بهم عريان .

الامريكان ، المتغطي بهم عريان .
كتب د :سامح الهواري

أعلن الرئيس الأمريكي أنه مقموص وزعلان قوي علي ما يحدث في اوكرانيا .طيب ما النتائج المترتبه علي هذا الزعل والتأثر ؟، خرج بايدن واعلن منذ قليل عدم المشاركه بأي جندي امريكي في الحرب في أوكرانيا . وفي نفس ذات الوقت خرج رئيس وزراء بريطانيا ووجه رسالة مؤثره جدا لأوكرانيا تدمي لها القلوب وعبر عن أسفه لما يحدث في أوكرانيا وأنه قلبا وقالبا مع أوكرانيا . قال ايه بأه : ” إن قلبي معاكي يا أختي احنا بنصلي من أجلكم”
هذا هو رد فعل القوي العظمي في العالم لما يحدث بأوكرانيا . بعد ما تخيلنا بعد التصريحات السابقه في الفتره الاخيره من نفس هذه الدول بأن ” التكلفه باهظه ” علي روسيا في حال غزو أوكرانيا وكانت كل التصريحات من الاتحاد الأوربي وأمريكا تؤكد علي الدعم الثابت لسيادة أوكرانيا وسلامة أراضيها والعمل علي زيادة الدعم لها ضد روسيا وهذا جعل العالم يترقب حدوث حرب عالميه ثالثه . وفي النهايه رسيت علي شجب للعنف وتعاطف ودعاء بالثبات لأوكرانيا.

جدير بالذكر إن الدولتين العظمتين الولايات المتحده الامريكيه وبريطانيا دول حامي حمى العالم وأمين شرطة الكوكب حصلت برعايتهم في التسعينات قعدة لطيفة كده في بودابست وكان رابعهما روسيا وأوكرانيا ..بموجب المعاهدة دي اوكرانيا سلمت ما يزيد عن1500 رأس نووي لروسيا!!! آه بالظبط كده أوكرانيا تنازلت عن سلاحها النووي لروسيا قصاد تعهد امريكي بريطاني بالدفاع عنها وحماية حدودها .. وتعهد روسي بعدم الاعتداء .. واتراضي الجميع واحتفلوا وشرب الجميع نخب السلام وعاد الوفد الأوكراني لبلده منتشيا بالانجاز . وثقه في الله ثم الدول العظمي اللي عملوا قعدة عرب محترمه وسلموا أوكرانيا تسليم أهالي، والنهارده بيشجبوا ويتعاطفوا ويصلوا .

على كدة الكام طيارة على غواصة على حاملة طائرات على القواعد العسكرية الجديدة على تنويع مصادر السلاح أمريكي روسي فرنسي صيني كوري لتحديث الجيش المصري ممكن ينفعوا في اليوم الاسود اللي زي ده .. الموضوع ده بيفكرني بأبو حنان الحاج ترامب ربنا يمسيه بالخير لما صرح وقال أنا قولت لمصر تدمر سد النهضة عسكريا وسوف ادعمها..

الخلاصه : اللي متغطي بأمريكا وبريطانيا زي اللي واثق في الترزي اللي نسي يحط البطانه في فستان رانيا .
وهنا التشبيه من وجهة نظري مظبوط لاني مش بخاطب رانيا ..انا بخاطب اللي ناوي يفصل فستان محترم وشيك وبطانته قايمة بدورها في حماية المؤخرة ميروحش بإرادته للترزي بتاع رانيا .