بقلم: راندة محمود
يا عالم اتحسدت
الربيع عندى اتحول برد
السور اللى حامينى اتهد
الكحل اللى فى عينى اسود
بعد ما كنت فى السما
أتهبت ع الارض
طريقى اللى كان سالك اتسد
بالذمة مش ابقى اتحسدت
حد باصص فى عيشتى بزيادة
بيعد عليا رزقى كالعادة
مش انت برضه خدت؟
ليه واقف على باب بيتى
بتراقب من عقب الباب
ودانك لزقها فى حيطى
وتقول لا سمعت و لا شفت
كداب ….
سمعت الضحكة وقلت سعيدة
شفت قصدها قد ايه دموع؟
اشتريت لعبة جديدة
بتسهينى عشان موجوع
اكلت آكلة لذيذة
حسيت لما كنت بجوع؟
كل نعمة بتجينى
قصدها تمن مدفوع
بس انا قافل
على قلبى ضلوع
و كاتب على بابى ممنوع
تاخد مكانى او آخد مكانك
كل واحد فينا رزقه موضوع
فى مكان مصنوع
من حديد وفولاذ
حتى لو كنت شايفه إزاز
ارقامه السرية مكتوبة
على جبينك
لو كنا شيفينك
مش ح تقدر تاخد
نصيب غيرك
حتى لو كانوا سيبينك
