بنادي عليك يا بابا
راندة محمود
بنادي عليك يا بابا
والنبي لترد
قلبك مليان طيابة
وخير للناس بجد
عمرك ما كرهت حد
ولما مشيت و بعدت
اختفيت لكن عمرك ما غبت
فكراك في كل وقت
كنت زمان بتدخل بالبطيخة
تنادي تعالي شيلي مني يا شيخة
كبيرة قوي يا حاج
لأ دا أنتي اللى خيخة
طب هات من ايديك
و أحطها ع الأرض
ويجي وقت العرض
وقت شقها بالسكينة
ويلفنا هدووووء و سكينة
عمرها ما طلعت قرعة
زي ما تقول كده الزرعة
ما هانش عليها تطفي
الفرحة اللي في عنيك
ولا تحول دفا قلبك برد
ونتلم حواليك بسرعة
ويبقى اكل و مرعى
وفى خيرك نرعى
فاكر يوم مولد النبي
تفرح البنت و الصبي
وأنت داخل علينا بالحلاوة
واحنا بشقاوة
نفتح العلبة الكبيرة
عشان اللي يلحق يختار
و أنت بتحكلنا في السيرة
وازاي كانت الدنيا في انتظار
وتحكي حكايات كتيرة
وتيجي المفاجأة الخطيرة
جايب حصان لأخويا
و عروسة المولد للبنات
ونتلم حواليك بسرعة
وبالساعات
ويبقى اكل و مرعى
وفي خيرك بنرعى
يا ريتك تيجي دلوقتي حبة
تعالى ما تجبش حاجة
بلاش تستخبى
اقعد معانا ان شالله ساعة
بنتي بقت شابة
وابني بيسألني عليك
انا بحكي لهم
كأنك ما بينهم
كان نفسنا نكون حواليك
فى قاعدة اللب و السوداني
و اللمة بيك ترجع تاني
واللي يتكسر في البيت
تصلحه بأديك
فاكر طيارات الورق
والدبور اللي منا أتسرق
و ترجع تعمل غيره
ربنا يكتر خيره
في الميزان
فاكر الزينة في رمضان
والبومب في العيد
واللبس الجديد
مين عاش زيي
مع ابوه سعيد
