كتبت: راندا محمود
الارض كانت على استعداد
بتتحضر للميلاد
و الميلاد كان له علامات
جت ع الوقت و ف الميعاد
ولو الزمن انعاد
ح نلاقى اولها فيل
ضخم و كبير
شكله خطير
لكنه كان مأمور
يبعد عن البيت المعمور
لحد ما هجمت الطيور
والمشهد خلص…
رجع الكل للبيوت بأمان
والمشهد التانى يبان
أم بتولد فى ليلة منورة
وهى حتى مستغربة
مفيش وجع و لا آلام
ما فيش غير انتظار هادى
يتهيألك انه مشهد عادى
بس ده كان اكتر مشهد مثير
نور بيستناه الطير
والملايكة و الجن وغير و غير
نور بيتحضرله العالم
من اول العالم
واخيرا حضر
لحظة! نوقف المشهد
عشان الوقت دلوقتى بيشهد
على بداية التغير
بص على الارض شوية
ح تلاقيها مش هيا
نورت زيادة
احلوت زيادة
زادت فيها البراءة
زاد فيها الخير
المشهد التانى كان أول النهار
فى الجو كتير غبار
النبى نازل من الغار
ايوه بقى نبى
جبريل وصله الاخبار
والنهاردة اول يوم
اتحركت الكواكب
واتحضرت النجوم
انشق القمر
انتشر الخبر
لما ملا الكون
المشهد تانى اتغير
الرسول واقف على جبل عرفات
الوقت قصير
قربت خلاص لحظة وصول
تمام النبى لمهمته
وقف يقول كلمته
يوصى على البنات
ويقولنا الصلاة
لحد ما يوصل العالم لنهايته
هى الحياة وللجنة بدايته
يقول الرسول انه اختار
يكون فى الجوار
والصحابة فاهمين الكلام
على رسولنا السلام
المشهد الاخير
لسه الدنيا فى خير
ببركة النبى و رسالته
بس احنا مفرحينه؟
بفرقتنا..بغربتنا ..
واحنا ضيوف على دنيتنا
فين هيا لازمتنا؟
اضعف امة امتنا
كل العالم معادينا
حتى الضعيف بتتنمر علينا
ازاى ومحمد نبينا؟
ازاى ح يكون فرحان بينا؟
بس اللى مهون علينا
كلام نبينا لما قال لينا
حياتى خير لكم
ومماتى خير لكم
تحدثون و يحدث لكم
تعرض على اعمالكم
فأن وجدت خيرا حمدت الله
وإن وجدت غير ذلك
استغفرت الله لكم
لسه فيه مشهد كنت نسياه
يا حبيبى يا رسول الله
كل ده و لسه مستنينا
عند الحوض
عشان تسقينا
لما نموت
وتاخد بأدينا
يا رب ٱمتى ٱمتى
ده اللى مطمنا و مواسينا
الحمد لله إنا أمتك و أنت نبينا
