يا بختك يا مكة
بقلم / راندة محمود
يا بختك يا مكة
بحسدك
ف القلب نبضة
مجرد تكة
بتجري في سرعتك
لما تيجي سيرتك
بأوعدك
اني يوم ما اجيلك
ح أحضنك
ح اوطي احضن السكة
ح احضن الشوارع
ح ارجع بعمري اللي ضايع
ليوم ما النبي اتولد
تصدقي ليها رجة
اني اوصل لبيت آمنة
وأتخيل النبي رضيع
وأوصل لبيت خديجة
واتخيل النبي
بيشتري و يبيع
خلاكي يا مكة ربيع
ح اقف علي جبالك
واتخيل النبي و هو بيقول
أنا الرسول
اقسم لو قدرت جيالك
ح احوش المجمد و الفكة
خليها ف بالك
بحسدك يا مكة
النبي شرف مقدارك
و علا جدارك
ليوم الدين
خلاكي حلم البنأدمين
كنتي بلده و أمه
ضحكة سنه
بس أنا بعتب عليكي
قسيتي يا مكة قسيتي
عذبتي حبيبي و اتباعه
فيه منك اللي باعوا
وفيه منك اللي اشتراه
بماله و عياله
وسنينه اللي جياله
في الآخر سبتيه يهاجر
يرحل و يسافر
ركب الحبيب الناقة
واتملت طاقة
وقال سيبوها دي مأمورة
نخت الناقة في القلوب
وبقت مسجد
فى العشق بيدوب
يا رب الوصول
لقلوب معمورة
بحب الرسول
وبدل ما ماليها الذنوب
جت المهمة الشاقة
تتغير لخير و عدل
وبدل النفوس العاقة
بقت الارواح ف النور
واتسقت القلوب البور
وطرحت لين و رقة
افردي دراعاتك يا دنيا
و أحضني مكة
واحسبي عمرك
من دلوقتي بالثانية
زهري.و اظهري للعالم
أم القرى
وفي ليلة
كنا خير أمة
لخير رسول
وآخر القول
حب النبي
ما لناش فيه حيلة
خلا الدنيا جميلة
ويا رب تكونوا في خير
لسنين طويلة
