ح تقتلنى دلوقتى؟
استنى شوية اما اشاهد
هو خلص وقتى ؟
ادينى كلمة نتعاهد
ح اسلمك امرى
ما روحى من زمان تاهت
لا بحولى ولابقوتى
الانثى اللى مكتوبة قدام النوع
فى شهادة الميلاد ماتت
واتكتب فى صفحتى
النوع كائن باهت
انا سبت الحياة من سنين فاتت
انا يا دوب بجاهد
عشان ارد عليك بكلام مفهوم
عشان اقدر الصبح اقوم م النوم
مفياش حيل حتى اناهد
بتقول للناس دى بتعاند
دى حلاوة روح
لروحى بتساند
اتحولت من حد سعيد
لروح شاخت
بتمثل انها صغيرة
لكن من جواها شابت
بتمثل قدام الناس
ان فيها كتير حماس
انها عايشة الدنيا باحساس
لكن لما تكون لوحدها
بتكون عارفة انها دابت
انتهت واختفت زى الملح
انها بأديها حاضنة الجرح
انها مؤمنة ان مفيش شئ ثابت
ح تقتلنى اكتر من كده؟
ما انا فى شهادة ميلادى ميتة
ح اكون واحدة من كتير غابت
بس موجودة عشان حاجات كتير
انت مش حاجة منهم
انت جهاز تدمير
انت اللى ح تكتب النهاية
ما تقولش قتلتها
قول هى اللى سابت
قول هى اصلا عاشت؟
قول ماكنتش بحبها
قول كانت عايشة فى وسط اهلها
ومعايا اتكسرت نفسها ماتت
راندة محمود
