الحلقة السادسة من رحلة البحث عن الذات
السلام الداخلي
بقلم: دعاء التوني
بعد كل المحاولات، وبعد التغيير والسقوط والقيام من جديد، يأتي سؤال مختلف: أنا محتاج أوصل لإيه علشان أرتاح؟
زمان كنت فاكر إن الراحة هتيجي لما أبقى ناجح، أو لما أحقق كل اللي نفسي فيه، أو لما حياتي تبقى مظبوطة. لكن مع الوقت تكتشف إن مفيش حاجة كاملة. هتوصل لحاجات، وهتفضل في حاجات ناقصة. هتنجح في جانب، وتتعب في جانب تاني. وهنا بقى الفرق: يا إما تفضل مستني الكمال وعمرك ما ترتاح، يا إما تتعلم تعيش وسط النقص.
السلام الداخلي مش إن حياتك تبقى مثالية، السلام الداخلي إنك تبقى متقبلًا.
متقبل نفسك بغلطك قبل صحك، ومتقبل إنك لسه بتتعلم، وإنك مش لازم تبقى أفضل نسخة من نفسك طول الوقت.
ومتقبل إن في أيامًا حلوة وأيامًا ثقيلة.
السلام الداخلي بيجي لما تبطل تحارب نفسك، ولما تبطل تقارن نفسك بالناس، وتبص على طريقك أنت.
لما تغلط، بدل ما تجلد نفسك، تسأل: إيه اللي أتعلمه من ده؟
ولما تتعب، تسمح لنفسك ترتاح من غير إحساس بالذنب.
ببساطة، تبقى صاحب نفسك مش عدوها.
يمكن حياتك لسه مش كاملة، لكن إحساسك جواك بقى أهدى، وده في حد ذاته انتصار.
السلام الداخلي مش محطة توصل لها، ده طريق تمشي فيه، ومع كل يوم بتقرب أكتر من التوازن.
في الحلقة الجاية هنبص ورا…
*”أنا الجديدة”*
*إنت بقيت مين بعد الرحلة دي كلها؟*
