و رب الكـون وحشتينا ……….. خلاص م البعد ملينـا
قوليلنـا إمتى هتحنـي ……….. قوليلنا إمتى هتجينـا
غلطنا كتير قوي فيكي ……. فا سامحي الله يخليكي
و وعد ان جيتي راح ناكلك ……. بمنقـارك و رجليكي
ولو وجعاكي سكينتي ……. و بتنغص ساعات عيشك
فا وعد كمان بقى ياستي …. لناكلك صاحيه وبريشك
فا هاتي الذكرى من تاني …. واجمل عمر عدى و فات
بلاش بخصامنا ده نعاني …. ونفضل ف البعاد أموات
أصيلة و عارف ان انتي ……… لا يمكن تنكري الأيام
دا حتى العشره ما تهونشي ….. إلا على فراخ الحرام
تعالي واللي فات انسيه …. عدمنا الشوربه ف رحابك
تعالي وكل شيئ تعوزيه …. هييجي ف ثانيه لجنابك
هجيبلك ف الشتا كسوه …… و اجيبلك عقد م الغالي
لكن خفى بقى الأسوه ………. و حني شويه و تعالي
ولو عاوزه سرير راح اجيب …. عيوني ليكي وحياتك
ولو عاوزه دولاب مش عيب ….. تحطي فيه غياراتك
زمان كونتيلنا ليل و نهار ….. سند ف الشده و المحنه
وكان بيضك بيملا الدار ….. و دلوقتي اللي باض احنا
زمان عشنا نربيكي ……… على سطوحنا و ف عنينا
و ليه دلوقتي معاليكي ………….. حلفتي انك تربينا
.
.
.
الشاعر اللواء محمد هيكل
