حين تأتي عطية الله
بقلم د/ برديس رزق
في لحظات كتير من حياتنا بنعدّي بظروف قاسية بنحس فيها إن الدنيا ضاقت وإن مفيش مخرج وإن كل الأبواب اتقفلت في وشّنا بنسأل نفسنا ليه وإمتى وهل هنرتاح تاني لكن الحقيقة اللي بنكتشفها بعد ما نعدّي المرحلة دي إن كل وجع كان وراه عطاء وكل ضيق كان بيمهّد لفرج أكبر مما تخيّلنا
عطايا الله مش دايمًا بتيجي في الوقت اللي إحنا عايزينه لكنها بتيجي في الوقت الصح الوقت اللي نكون فيه اتعلمنا نضجنا وبقينا مستعدين نستقبل الخير ده بقلب مختلف يمكن ربنا يمنع عنك حاجة كنت شايفها كل حياتك علشان يديك حاجة تانية أحسن بكتير حاجة تناسبك أكتر وتكملك بجد
أوقات الشدة بتكسرنا من بره لكنها بتبنينا من جوه بتعلّمنا الصبر وبتخلينا أقرب لربنا وبتخلينا نشوف النعم اللي كنا مش واخدين بالنا منها وبعد ما الغُمة بتعدّي بنبص ورا ونستوعب إن كل حاجة حصلت كانت لحكمة وإن ربنا عمره ما بيخذل حد لجأ له
كمان من أعمق المعاني اللي بنفهمها بعد المرور بالأزمات إن عطية الله مش شرط تكون في شكل الحاجة اللي طلبناها لكنها بتيجي في صورة الحاجة اللي إحنا محتاجينها فعلًا يمكن تكون راحة بعد تعب أو أمان بعد خوف أو ناس صادقة تدخل حياتك في الوقت الصح وتغيّر كل حاجة حوالينك ودي من أكبر العطايا اللي ممكن الإنسان ياخدها من غير ما يكون متوقع
التجارب الصعبة بتخلينا نعيد ترتيب أولوياتنا وتخلينا نعرف قيمة نفسنا وقيمة النعم الصغيرة اللي كانت عادية بالنسبالنا قبل كده وده في حد ذاته عطاء كبير لأن الوعي اللي بنكتسبه بعد الألم بيكون مختلف بيخلينا نعيش الحياة بعمق أكبر وبامتنان أكتر
أجمل حاجة في عطايا ربنا إنها بتيجي فجأة من غير ترتيب من غير توقع وتكون أكبر من دعواتك نفسها تلاقي نفسك بتقول هو أنا استاهل كل ده والحقيقة إن رحمة ربنا أوسع من استحقاقنا وأكرم من توقعاتنا
وفكرة إن العطاء بييجي بعد الصبر دي مش صدفة لكن دي سنة من سنن الحياة إن بعد الضيق في سعة وبعد الحزن في فرح وبعد الصبر في جبر وكرم كبير من ربنا يخليك تنسى كل لحظة تعب عدت عليك وتحس إن كل حاجة كانت بترتبك علشان توصل للحظة دي
فلو إنت دلوقتي في مرحلة صعبة استحمل شوية مش كل تأخير حرمان ومش كل وجع نهاية يمكن اللي جاي هو أجمل عطاء في حياتك ويمكن ربنا بيحضّرك لفرحة تنسيك كل اللي فات
ثق إن بعد كل ضيق في عطاء يستاهل الانتظار
