الناس اتغيرت؟ ولا إحنا اللي نضجنا؟ ولا إيه الحكاية ؟.
كتبت /دكتورة ايمان السرياقوسى
زمان، كنا بنشوف الناس بقلوبنا. بنسامح بسرعة، ونعدّي المواقف كأنها ما حصلتش.
لكن دلوقتي بقينا نحس بكل حاجة، نلاحظ التفاصيل، ونتوجع من أبسط تصرف.
أكيد في ناس اتغيرت…
الدنيا جريت، العلاقات بردت، والمصالح دخلت في كل حاجة حتى أقرب الروابط.
بس إحنا كمان اتغيرنا…
نضجنا، وعرفنا قيمة نفسنا، وبقينا نختار الراحة على المجاملة.
بقينا نبعد من غير صُراخ، ونسامح من غير ما نرجع، ونخاف على هدوءنا أكتر من علاقتنا بالناس.
الحقيقة؟ الاتنين اتغيروا.
هم اتغيروا… وإحنا نضجنا.
بس اللي يفرق فعلًا: إننا نعرف إحنا عايزين نكمّل مع مين، ونرتاح مع مين، ونحافظ على مين️ومهما كانت الاجابه حافظ على سلامك النفسي.
