امي بقت بنتي
راندة محمود
أنا كنت في الاول بنتها
ومن بعدها بقت بنتي
انا اللي كبرت ف حضنها
سنتي…سنتي
وهي دبلت ف حضني
وانطفت وراح حسنها
هي ربت و سهرت و كبرت
وأنا اللي شفتك لما كنتي
قوية و عافية وكنتي
ضهري و سندي
يوم بعد يوم بتضعفي
وبستعطفي
صحبتي و بري
وبعد ما كنتي
بيري و سري
بمد لك ايدي تسندي
عشان تقفي وتسندي
عشان تمشي
بمد ايدي أكلك و اشربك
واسرح شعرك و ألبسك
وكل يوم بوعدك
مش ح امشي
وبمشي
كنتي كل يوم بتغربي
ونورك كل يوم بينطفي
وما بقتيش تعرفي
امتى كل حاجة ووقتها
لو بأيدي ارجعلك شبابك
احوش في جيبي ترابك
اللي عليه بتمشي
لكن العمر قطر ما لوش رجوع
حاسة جوايا بجوع
يا ريتني حفرتك في قلبي وشم
وحقيقي مش وهم
ومهما كنت بأجل و تأجلي
كنت و انا ماسكة ايدك
بترحلي
وفي النهاية
كتبت اسمها
علي شاهد قبرها
صدقتي وآمنتي
انا عشت عندها
وهي ماتت عندي
