كلهم زي بعض
بقلم /هناء_زغلول
من قديم الزمان وفي صراع بين الراجل والست وخصوصا بعد الجواز كل واحد بيكتشف العيوب اللي كانت مداريه .
فجأه الملاك البريئ بيتحول وضغوط الحياه بتغيره و يشوفوا بعض من غير اي اقنعه.
من هنا بيبدأ كل واحد يسترجع ذكرياته مع الإنسان اللي كان قبل الجواز ويتمني انه يرجع به الزمن و يعيش حياة جديدة
فتلاقي الراجل دايما بيركز علي عيوب شريكة حياته ويقارنها باللي حواليها ويا سلام لو في واحده بتتقرب منه وهو طبعا مش هيمانع ولا يصدها عشان الراجل بطبعه قلبه كبير وحنين فتبتدي التانيه تسمعه كلام زي ياريت الرجاله كلها في حنيتك ياريتني عرفت واحد زيك من زمان مراتك مش مقدراك ولا حاسه بقيمتك فيتنفخ كده ويشوف نفسه ويحس ان معاه طوبه في البيت وينشغل بالتانيه النحنوحه
وفي الجهه التانيه مراته تلاقي اللي يبعتلها رسايل وورد و يحسسها انها ملكه الكون وان مافيش ست علي الارض في جمالها ورقتها وبتبقي نفسها جوزها يكون عنده نفس الاحساس من ناحيتها ويسمعها الكلمتين الحلوين دول
خلاص كل واحد لقي البديل اللي يسمعه اللي نفسه فيه
طب هقولكم الخلاصه كلهم زي بعض لو انضحك عليكي بكلام الحب والغرام فعايزه اقولك انها اسطوانات محفوظه واللي بيسمعك الكلام دا بيروح لمراته شايل كيس الفاكهه وبيتغدي ومابتسمعش منه غير صوت الشخير وهو نايم
و هتلاقيه أسوأ من النسخه اللي معاكي
وانت يا استاذ يلي انشغلت بالاموره الدلوعه هي كمان ماتفرقش حاجه عن مراتك اول ما رجلك تيجي وتدخل في الجد هتلاقيها نفس العينه ونفس الزن والرغي والغيره والعناد مافيش اي تغيير
فكل واحد كده يستهدي بالله ويرضي بحاله عشان في الاخر كلهم زي بعض
والسلام عليكم ورحمه الله
