يا جريدة النخل
راندة محمود
يا جريدة النخل العالى تعالى
اسمعك حكاوى ع القهاوى
وفى الغناوى بالربابة بتتقال
كان لنا ارض ف النحية التانية م القنال
اتخدت منا وسنا سنا تار بينا بيتشال
فى يوم اتجمعوا الرجال
واتحد العرب عارفة يعنى ايه؟
يعنى اتحركت جبال
وبدل البطل انشقت الارض
بملايين الابطال
صدقينى يا جريدة
دا اللى اتقال
يا جريدة النخل العالى تعالى
ح اشاورلك ع الزمان
كان ستة من اكتوبر
و عشرة من رمضان
والساعة اللى ف ايديه
رنت ف المكان
الساعة اتنين الضهرية
وكبر الجدعان
طيارات ف السما غطت الغيوم
اما يوم…
القنال اتملت بالجنود
رجال بتفوت
و ابطال بتموت
و اتغطت الارض بانهار
دم رايق فى عز النهار
الدم الخفيف اللى ماليها هزار
مابخلش بروحه ورا خط النار
ماكنش ف راسه افكار
غير انه ياخد بالتار
اما نهار
وطلع م القمم المارد الجبار
اللى خلى خط بارليف ينهار
بخرطوم ميه يعنى مش حوار
واتقفل الستار
على كدبة كبرت و اتنفخت
لحد ما بووووووووو انفجار
مش قولتلك اما نهار
وخلص النهار
يا جريدة النخل العالى تعالى
كل امال العدو بتنهار
وكل شهيد متمدد ع الارض
حاضنها داخل جواها
حماها اتوحد معاها
تصدقى يا جريدة
طلعتله جناحات
وطار و طار وطار
اما نهار
لما كان بين السما و الارض
لف حوالين نفسه
فى اخر عرض
ابتسم يا جريدة ابتسم
روحه الشهيدة
ضمتنا ودعتنا سبتنا
للدنيا الجديدة
روحه الشهيدة
عمرها ما ح تبقى بعيدة
ح تشوفيه من فوق يا جريدة
يا بختك يا بت السعيدة
