يا عيني ع الغلبان
راندة محمود
خبط القاضي خبطة
و رفعت الجلسة
وتم عرض الاتهام
خلص الكلام
اتحولت أوراق قلبى للمفتى
واتحكم عليه بالأعدام
يرجع لوظيفته الطبيعية
يضخ الدم عشان أعيش
يحب يحس لأ ما فيش
يرجع يملاه الخير و الحنية؟
دي المشكلة الحقيقية
بيتقال عليه عبيط
وعديم المسئولية
الدم فى عروقي بيشيط
ليه الاتهام؟
بجد أنا فى حيرة
ليه يتقال عليا أنا الشريرة؟
هو الحب حاجة خطيرة؟
ولا رسالة سلام؟
والخير و الحنية مجرد كلام؟
ليه يسود قانون الغابة؟
ليه الدنيا على طول قلابة؟
ليه الأسد ما بقالهوش مهابة؟
ودلوقتي بقى حكم الجرابيع
كل شئ بقى معروض للبيع
أي حاجة و تجيب بس فلوس
بقت خرابة النفوس
و اللي ماعهوش فلوس
بقى ذليل ووشه فى الارض
بقوا نازلين فيه خدش و عض
وبقى معروض فى المزاد
صحة و علم و ميه وزاد
ما بقالهوش شرف و لا عرض
كله مستباح
عشان أتكسر الجناح
يا عيني ع الغلبان
بقى في الدنيا متهان
بقي في زمن سداح مداح
أحسن يموت و يرتاح
