الفنان المبدع القبطى الذى حفظ القران الكريم متابعة /غادة شكرى الفنان “بشارة واكيم”.. فنان شارك في حوالي 100 فيلم مصري!.. دخل كلية الحقوق واتخرج منها وكان مرشح إنه يسافر فرنسا يكمل دراسته هناك لإنه من الطلبة المتفوقين لكن للأسف إندلاع الحرب العالمية وقف الخطة دي!..
اشتغل محامي بس في نفس الوقت كان بيروح فرقة “جورج أبيض” عشان يشارك في مشهد ولا إتنين في أى مسرحية.. في مشهد من المشاهد اضطر إنه يحلق شنبه، ولما أخوه شافه طرده من البيت وقال له يعني إنت تتخلى عن رمز رجولتك عشان خاطر الفن!.. طب اطلع بره وروح كمل حياتك من مطرح ما جيت.. وراح “بشارة” يبات في المسرح!..
كان عنده موهبة عبقرية في حفظ وكتابة الشعر لدرجة إن الفنان “أنور وجدي” عرض عليه إنه يتكفل بمصاريف طباعة ونشر ديوان شعري ليه بيحوي أهم إصداراته لكن “بشارة” رفض بحجة إنه بيكتب الخواطر دي لنفسك وللناس!..
علي فكرة “بشارة” يعتبر من اوائل اللي اشتغلوا في السينما المصرية من أول الأفلام الصامتة “برسوم يبحث عن وظيفة” ثم تقديمه لأول بطولة مطلقة ليه في فيلم “لو كنت غني”..
جزء من عظمة مصر هو إن الفروق بين الطبقات والناس دايبة وملهاش وجود.. مفيش فرق بين مسلم ومسيحي أو غني وفقير.. طبيعة الحياة نفسها زمان كان الرتم بتاعها هادي لأقصى درجة.. يعني مثلاً كفاية إننا نعرف إن “بشارة” كان مسيحي ورغم كده صمم يحفظ القرآن الكريم كامل وكان دايماً لما يسألوه عن سبب تصرفه ده يرد ويقول إن اللي عايز يفهم ويتثقف في اللغة العربية يبقي لازم يتعلم ويحفظ ويدرس معاني القرآن الكريم لإنه البوابة لكده!..
هو برضه كان من أشهر العزاب في الوسط الفني وكان واخد قرار إنه ما يتجوزش بسبب دعوة والدته اللي قالتهاله: (روح إلهي يبتليك بجوازة تهد حيلك) بالتالي كان خايف ياخد الخطوة وبعده كده دعوتها تستجاب والعروسة تطلع عينه!..
من المعروف برضه عن “بشارة” إنه ومن كتر حبه للمسرح كان بيندمج جداً فى تأدية أدواره.. في مرة كان بيعمل مسرحية مع “نجيب الريحاني” وفي وسط العرض ضغطه ارتفع وحس بإعياء شديد وضيق في التنفس.. “الريحاني” طلب منه إنه يريح خلاص بقى لكن “بشارة” رفض وصمم يكمل العرض، وصمم إنه مايروحش يكشف.. التعب استمر، و”بشارة” بيتحامل على نفسه!.. لحد ما في مرة ماقدرش يصمد أكتر من كده وإنهار صحياً وتم نقله للمستشفي واتحجز هناك!.. لكن وعشان “بشارة” مش بتاع حبسة في سرير في مستشفى، وعشان الدكتور بتاعه أجبره إنه يفضل في المستشفي فترة لحد ما يطمنوا على كل حاجة؛ طلب “بشارة” من الدكتور إنه يخرج ولو ساعة واحدة بس كل يوم يتفرج على المسرح ويحضر أى عرض وبعدها يرجع تاني للمستشفي لإن ده هيخلّي حالته تتحسن!.. رغم غرابة الطلب لكن بيوافق الدكتور، والأغرب إنه “بشارة” فعلاً تحسن تدريجياً بسبب الساعة اللي بيخرجها للمسرح كل يوم دي!..
ربنا يرحم الفنان الخير الأصيل “بشارة واكيم” عاشق المسرح الموهوب والمتمكن.
