نفسي
……… بقلم سحر ابوالعلا
نفسي
نفسي في رمضان زمان
وسط لمة العيلة
بعد الفطار يجي
عمو فؤاد ينده علينا
اجمعوا يا ولاد
وبعد العشا والتروايح
نسمع نيللي وشريهان
في ألف ليلة وليلة
وليالي الحلمية
منها اجزاء طويلة
والشوارع مليانة
زينة
والبيوت بالفرحة
عمرانة وجميلة
ومسحراتي حتتنا
واحد واحد
حافظ اسامينا
ينده ويقول
اصحى يا محمد
اصحي يا زينة
وابويا للسحور
بفرحة في صوته
يصحينا
وع الطبلية من ايد امي
طبق الفول بينادي علينا
والخيار ويا الزبادي
لجل ما يرطب علينا
بعد السحور دوغري
صلاة الفجر بركتها
تدينا
ونجري ننام علشان
للمدرسة نصحى اوام
وبالصيام ويا القرآن
يحلى نهارنا
ونحيي ليلنا بالقيام
وفي نهاية رمضان
نستنى العيد
في حضن اللبس الجديد
مكنش ناقصنا حبيب
والكل كان سعيد
…………………..
سحر ابوالعلا
