باى باى

باى باى يا براءة ..باى باى يا طيبة
الطيبة هجرت و بقت غريبة
اجنبية فى بلدها بتتكلم لغتها
ما حدش فاهمها و لا معترف بيها
فى ارض ميلادها فى بلادها
لازم نخبيها
حفرنا الأرض ندفنها
ما طرحتش و لا نبتت
لاقيتنى نسيت انا اسقيها
كأنها كانت عيبانى
و ما صدقت ارميها
وفى اقرب بحيرة صافية
بصيت فيها
لاقيت الشكل مش شكلى
ولا ملامحى يا بحيرة عرفتيها
كبرت ضوافرى و انيابى
وصورتى اتحطت فى كتابى
كانت بتسطر لغيابى
تعيد الوقت بشبابى
وقت نوره كده ضبابى
لا ملامحى عرفاها
ولا صورتى عايزها
ولا اوقاتى حسباها
دى دنيا مش حباها
جريت ع الارض احفرها
طلعت طيبتى من تانى
اعيش ازاى من غيرها؟
ولا غيرها لزمانى
ح يقولوا عبيطة و خايبة
مشعبطة فى الحبال الدايبة
يقولوا بس ما تروحش الطيبة
ولا العيبة تكون سايدة
ويفضل طول الحياة
فيه فايدة

راندة محمود