لو البنت خافت
يا بوى لو البنت خافت
يا بوى لو عازت و خبت
يا بوى لو مرة قالت
واتمنعت قامت كدبت
اه لو البنت اتربت
بس بالاوامر
وصحاب البيت اللى عامر
ادوها لواحد جلاد
يكسرلها ضلع
وضلعين و تلاته كمان
والتاريخ من تانى ينعاد
يبقى موت مش ميلاد
وبدل ما تقوم وتكون كيان
تبقى شئ مركون متهان
اتربت مكسورة
اتعودت تكون مقهورة
لما جت الفرصة تكون متخبية
ورا كيبورد وشاشة
بقى لها حياة سرية
كأنها جنية مش متشافة
وتخترع لنفسها شخصية
فلانة القوية
و صوابعها ع الزراير
بيكون ساكنها شيطان
سابت طابور البرابر
وبقت الساحرة العرافة
يا وقعت هى فى ايد ابليس
يا يطلب ايدها اى عريس
يا تبقى الارملة السوداء
وياعينى على البؤساء
اللى ح تعلقهم فوانيس
خد بنتك فى حضنك
ورفقا بالقوارير
اوعى تحاول تعدل ضلعها
لتكسره
اتعامل معاه على عوجه
ح تغيره
خليها زى الطير
مهما تطيره
يرجع بطيور الغير
ولافيش غراب ح يحيره
خليك تاج على راسها
خليك الراس اللى ح ترفعه
راندة محمود
