الكلمة الحلوة
راندة محمود
حد عنده كلمة حلوة
أو طبطبة ع الاكتاف
أو ضمة أخوة
ويكون في ضهري
عمري ما أخاف
حد عنده قلب صافي
يسعني في شدتي
أو عنده حضن دافي
يقلل وحدتي
أو ايد حنينة
تسندني ف مشيتي
حد عنده روح بريئة
ترفع ايديها للسما
وتدعي لي دعوة خالصة
لوجه ربنا
أو عنده لمسة رقيقة
للحق يردنا
فيه حد عنده وقت
يسأل علينا
أو في الحزن يواسيينا
في الغضب يهدينا
ينصرنا على مين يعادينا
فيه حد يجبر بخاطرنا
في القعدة يكون كبيرنا
في الرحلة يكون قائدنا
وحامينا
فيه حد ممكن يكون
وطانا و أرضنا
يكون الأخ
مع أن اسمه
مش على اسمنا
يا ريتني أكون أنا
