كتب د: سامح الهواري
عجيب اوي البيان الرسمي الخاص باغتيال رئيس هايتي .
بيقولك يا سيدي: أعلن رئيس الوزراء مقتل رئيس البلاد جوفينيل مويس برصاص شخص او أشخاص مجهولين تسللواإلى مقر إقامته خلال الليل.” !!!!!!؟؟؟؟؟
تحس كده انه كان بايت عند عمته في ناهيه اللي هو عادي كده حرامي طلع على المواسير وهو بيسرق دخل عليه الرئيس… اوم ايه الحرامي اتخض فقتل الريس .
طب يله بأه لازم البوليس يتأكد لو فيه مسروقات ويرفع البصمات ويضاهيها ببصمات العاملين في القصر وذويهم.
لأ وايه كمان بعض شهود العيان أدلوا ببعض المواصفات الخاصه بالجناه وقالوا إنهم يتحدثون الانجليزيه والاسبانيه . معني الكلام ده ايه ؟؟؟!!! إنهم شافوهم وسمعوهم وحضروا الجريمه كامله ولكن تعذر علي هؤلاء الشهود القبض علي الجناه .
الغريب بأه في الموضوع ده أن الراجل ده في فبراير اللي فات نجي من محاولة أغتيال فاشله بس الحمد لله المجرمين ما اعترفوش بفشلهم وهزيمتهم وأشتغلوا علي نفسهم ونجحوا في النهايه وقاموا بأغتيال الرئيس وده إن دل علي شيء فيدل علي أن الاجرام مش هوايه وخلاص اد ما هو عزيمه وإصرار واخلاص.
وجدير بالذكر أن واشنطن ولندن تعربان عن قلقهما لموت المغفور له مساء الثلاثاء علي يد مجهولين . وطبعا هناك ١٠٠ خط تحت كلمة مجهولين بعد كل الحقائق السابقه !!! مش بس كده ده كمان ان الحكومه الأمريكية وليست الحكومه الهايتهيه هي التي تدرس ملابسات الجريمه الشنعاء .
ومحدش يرجع بأه بالذاكره للبرنامج الاذاعي ” من الجاني” ويخمن مثلا أن ممكن يكون القاتل هو رئيس الوزراء . لأ مش هو . قولي ليه ؟؟؟ علشان ده كان حبيبه وكان بيناديه بأسمه حاف .
وفي النهايه بعد أن سردنا جميع خيوط الجريمه أتقدم انا بصفتي وبالانابه عن نفسي بتقديم أحر التعازي للشعب الهايتي في مصابه الأليم .
