يا الأب القاسي
راندة محمود
يا الأب القاسي
يازين ما ربيت
عيل جبان وشه للحيط
سوسة ومن غير ما يبان
يقدر على كل مصيبة
ولو عدت أوقات عصيبة
مش ح تلاقي اللي يواسي
مفيش لا ضهر ولا سند
متقولش طفل وعند
ده مستني يشوفك
ضعيف وهو القوي
وعشان ما بقاش إنسان سوي
ح تلاقيه ليلة صيف
فيها الحر زند
ح تلاقيه بحر لطيف
لكن وياك يقلب طوفان
موجو جبل براس شيطان
مستني الوقت المناسب
وينطبق ويغرق فرعون
ما فيش شئ بيهون
ح تبقى للقهر زبون
وعلى كل الفاتورة ح تحاسب
عملتلك إيه قسوتك؟
عملت إيه خبطتك ؟
اللي تخبطها على الباب
الكل اترعب
عملك إيه السباب؟
ع الفاضي و المليان
ياللعجب!
عملت إيه كلمة
يا فاشل يا جبان؟
عملك إيه اللسان؟
اللي كان بيهد في إبنك
لحد ما بقلهوش كيان
عملت إيه الكدمات على جسمه؟
كره إسمك اللى جنب إسمه
كره ملامحك اللى ف رسمه
خلاص تعب
من كونه كداب
بألف كدبة
عشان يفلت م العقاب
يا الأب القاسي إحذر
مهما تقطع و تكسر
انت بتزرع زرع محروق
لما تجوع مش ح تدوق
صحصح فووووق
مش ح تزرع حنضل
وتحصد ورد
مش ح ترسم إبتسامة
وتلاقيها دموع ع الخد
مش ح تبني خرابة
وتسكن قصر
مش ح يأدن ضهر
وتصلي العصر
ما تقولش عقني
بعد ما ربيته
اسأل نفسك
إيه اللي بنيته؟
قبل ما يعقك
أنت عقيته
وده اللي زرعته
وده اللي جنيته
