مجمعانا
بصى بقى يا شقيانة
اتجدعنى شوية معانا
دانتى يا غالية اللى مجمعانة
ضمانا فى حضنك مدفيانا
م الحنية مشبعانا
بصى بقى يا جنتنا
يا اللى معطرة فى الناس سيرتنا
يا اجمل زهرة فى جنينتنا
يا اجمل نساء الكون
منورانا منين ما يكون
لو واقفة مارد جبار
ولا بجسم شاخ و انهار
وانتى فى مكانك لوحة جميلة
لمة الاهل و عيلة العيلة
اول يوم رمضان كلنا عندك
وان معرفناش
يبقى لسه رمضان مجاش
وإن العافية كانت بتعندك
متأوحهاش
برضه جاين لك يوم العيد
لابسين لك جديد ف جديد
بتلعب ف الفسحة العيال
واحنا بنقول اللى بيتقال
كلنا بصوتنا العالى
والضحكة طالعة من القلب
ووشك اللى بيلالى
ومن عنيكى اشعة حب
طالعة تخلى القلب يطب
هنا و استوب
ربنا يخليهالى
عشان رمضان يجى ف معاده
والعيد نبقى من عواده
الامهات جوه البيوت
خلت لرمضان صوت
و للعيد صوت
يلم عيالها وعيال عيالها
م البيوت
ولعندها الكل يعود
راندة محمود
